O Fepuari 2018 na faatulaga e faatino ai le uluai malaga faapisinisi a le kamupani vaalele o le Real Tonga mo Samoa, peitai, o le afa na taia ai Samoa ma Tonga i lea lava masina na toe tolopo ai lea malaga muamua ona sa matua faaleagaina le tele o fale ma meatotino i Tonga e aofia ai ma fale o le Real Tonga Airline i malae vaalele i Vava’u ma Fu’amotu i Tongatapu. I le tuanai ai o le fa masina o faia galuega e toe faaleleia ai ia aseta a le kamnupani vaalele o le Aso Faraile ua mavae 29 o Iuni 2018 na faatoa taunuu ai le malaga muamua faataupou poo le inaugural flight a le vaalele e 30 le pasese a le Real Tonga Airline.
O le aumalaga o sui o le Malo o Tonga, le atinae o tagata tafafao, ma le aufaigaluega a le Real Tonga Airline. Na faatalia le taunuu o le malaga muamua faataupou e sui o le pulega o le Samoa Airways, o le Malo, le aufaipisinisi ma le pulega o tagata tafafao i Samoa. O le vaalele ua faaaoga i ia malaga o le ituaiga o le 34-seater SAAB ma e tuua le malae vaalele faavaomalo o Fu’amotu mo Vava’u ma faaauau ai mai ai i le malae vaalele i Faleolo.
Faaalia e le Ofisa sili lagolago o le Real Tonga Airline o Fakatele Faletau o se matati’a maualuga ua ausia e le kamupani vaalele le faia o ni ana malaga muamua faavaomalo i se isi atunuu o le Pasefika aua o le tele o malaga o totonu lava o Tonga. Fai mai le alii pule sili lagolago o se miti a le alii Pule Faatonu o Tevita Palu ua taunuu.
E le gata o pasese mai Tonga e fia malaga mai i Samoa ma faaauau atu ai i Amerika Samoa poo le agai foi i Hawaii ma le Malo tele o Amerika o le a manuia fuafuaga o a latou femalagaiga i le tautua ua amatalia, ae o pasese foi mai Samoa ma Amerika Samoa e fia malaga i Tonga. O le isi itu taua o oloa tau faatoaga e fia aumai mai Tonga e pei o le fua o le laau o le meleni e faatau mai i Samoa o le a vave ma faigofie aua o le a mafai e le Real Tonga ona faatino ma lea tautua.
Mo Samoa na faaalia e le pulega o le Samoa Airways o le amataga foi lea o sana tautua i se faiga paaga ma le kamupani vaalele a Tonga mo pasese malaga aemaise o tulisi e afea Tonga ae fia malaga mai i Samoa mo ni tafaoga. O le taimi nei e le o iai ni malaga a le Samoa Airways agai atu i lea motu tuaoi ae o le avanoa lenei ua mafai ai ona totogi pasese i le Samoa Airways e faaaoga ai le vaalele o le Real Tonga Airline.
