E to‘a fasefulu lima tamaitai laiti mai le 13 tausaga le matutua o loo vaaia e le Toomaga mo ē Puapuagatia ona o sauaga ua aafia ai, ua nonofo nei i le maota fou na fausia e se alii Ausetalia, e lē o manao faailoa lona tagata. O ia foi lea na faatupeina le faleaoga ua faaaogā e fanau o loo i le vaaiga a le Toomaga.
E silia i le tolu selau afe le tau o le fale na tatala i le vaiaso ua mavae. Fai mai le Peresetene o le Toomaga, le faletua o Siliniu Lina Chang, ua tele ma anoanoai le agalelei o lea alii i fanau a le atunuu o loo latou vaaia. “E ese le faagaeetia o i matou i lenei Samaria agalelei, auā e lē o muta lona fia foai mai pea ona o le alofa i tamaiti”.
O le fale fou ua nonofo ai tamaitai laiti ua sauaina ua faatotoga i moega fou ma faamalu mai Ausetalia. Ua iai foi vaega uma e manaomia e tamaitai e pei o fale ta‘ele ma faleui. O le TV flat screen i se vaega o le fale ua faapitoa e matamata ai.
Ua iai foi ma se potu mo se tina na te vaaia fanau teine, peitai ua faaalia e le peresetene ua faatonu lava tamaitai matutua i vaega e tatau ona nofo uta i ai i le vaaiga o latou, ma atonu o le a lē manaomia ai se tina na te vaaia i aso uma.
O sauaga e pei o faigaaiga fai faamalosi, faaoolima matagā, o loo aafia ai tamaitai laiti o loo nonofo i le vaaiga a le Toomaga, ae na faaalia e Siliniu, o nisi tamaitai sa latou mafuta ua toe foi i o latou aiga.
“E toalima nisi tamaitai na faatoa tuua le nofoaga i le masina na te’a nei (Iulai 2015), ae toatele foi isi teine sa nofo ile matou nofoaga ua faapena ona toe taliu io latou aiga ina ua mae‘a faamasinoga o i latou sa molia ona o sauaga ia i latou”.
O le tasi lea o vaega o le galuega a le Toomaga o loo tuliloa nei poo le ā se taunuuga lelei ua feagai ma ia fanau teine laiti ua toe foi i o latou aiga, e fua i aafiaga sa latou feagai, ma le taimi sa nonofo ai i le vaaiga a le faalapotopotoga.
“ E sa‘o lelei lava o le isi lena tulaga e ao ona matou toe savalia ai aiga o teine, po ua ā mai le latou mafutaga i totonu o le aiga, pe o toe iai nisi faaletonu o aliali mai”.
O le maota fou ua faapitoa mo tamaitai laiti ua sauaina, e lē mamao ese ma le faleaoga ma le nofoaga fou na tatala i nai masina e lei mamao tele atu ua faapitoa e tausia ai fanau pepe a tamaitai ma tina ua sauaina. Ua faapitoa foi lea nofoaga mo pepe ua sauaina e o latou mātua poo aiga.
