O le vaiaso ua tea na amatalia ai le lona lua o fonotaga faasavali faaletausaga a le Pasifika Futures Ltd, le matagaluega o loo nafa ma le faatāuaina o le polokalame “Whānau Ora” mo le soifua laulelei o aiga Pasefika.
Na usuia nei fono faaletausaga amata mai le Aso Gafua 17 o Aukuso i aai o Dunedin ma Kalaiasetete, e faalauiloa ai vaega tupe faapea faalapotopotoga, asosi ma sosaiete o loo galulue faatasi ma le Pasifika Futures mo le faasavalia o le polokalame o le “Whānau Ora” e fesoasoani atu ai i aiga o loo resitala i lalo o lea polokalame.
O le Aso Lua sa faaauau ai nei fonotaga i le aai o Invercargill. Na toe iloiloina ai nisi o fuafuaga faataoto mo lenei polokalame auā lava le manuia o aiga ma tagata lautele, e lē gata i tagatānuu Samoa, aemaise o tagata atumotu o le Pasefika o loo fia maua se fesoasoani mo atinaeina o a latou aiga, ekalesia ma faalapotopotoga mo le ola laulelei totonu o le atunuu.
O le faasavalia o nei fonotaga na amatalia mai le motu i Saute i le aai pito i lalo o le atunuu, le aai o Invercargill seia oo atu i le aai pito i luga o le atunuu, o Kaitaia.
O le Whānau Ora o se polokalame na faafoeina mai le tausaga na tea nei, e ala mai le foai a le Malo i se tino-i-tupe e 30 miliona mo le tolu tausaga i le Matagaluega o le Pasifika Futures, o loo faauluulu e le tamaitai Toga o Debbie Sorensen, e faasavalia ai ni polokalame eseese mo le manuia lautele o aiga Pasefika.
Na faaalia e Debbie e faapea o lana Matagaluega o le Pasifika Futures lea o loo nafa ma le faafoeina o lenei polokalame e fai ma fofoga taumomoli i le va o aiga Pasefika faapea le Malo aemaise faalapotopotoga o loo latou galulue faatasi i le faasavaliina o lenei polokalame.
Ina ua latou mauaina le konekarate mai le Malo e faatinoina ai lenei polokalame, sa faapea ona latou faasavalia ni fonotaga i le tausaga ua tea e avea ma auala e faaali mai ai manatu ma lagona o aiga Pasifika poo ā tonu vaega o loo fia moomia tele ai se fesoasoani.
O vaega nei e fā sa faapea ona au uma i ai manatu o aiga Pasefika:
•Moomia o se fesoasoani le itu tau i aoaoga
•Soifua laulelei ma le ola maloloina
•Faaitiitia o mea totogi ma ia lava le faasoa e teuina ai se tupe mo le faatauina o se fale
•Unaia o tagatānuu Pasefika i tulaga tau taitai i totonu o le Malo, nuu, Ekalesia, Faalapotopotoga ma Aiga
O nei fonotaga na mauaina ai le avanoa e faamalamalama atili ai e sui o le Pasifika Futures vaega o loo agai i ai le tupe lea na tuuina mai e le Malo e faatinoina ai polokalame mo vaega oi luga Sa faapea foi ona maua ai le avanoa e faamanino nei polokalame o loo faatupeina lalo o le “Whānau Ora”, vaega o le atunuu o loo faagasolo ai nei polokalame mo aiga faapea faalapotopotoga ua tofiaina e galulue faatasi ma le Pasifika Futures mo le tuleiina o nei polokalame mo le ola manuia o aiga Pasefika.
Na saunoa Debbie o le Pasifika Futures Ltd na amatalia mai ana galuega i le masina o Mati 2014, ma ua ova atu ma le 2,500 aiga ua resitala i lalo o le polokalame o le Whānau Ora.
E tusa ma le 134 tusi ofo (proposals) sa tuuina atu i le Pasifika Futures mai faalapotopotoga eseese o loo fia auai i le faatinoina o le polokalame, ma pe tusa ma le $35 miliona lona tau aofai. O le faafitauli e na o le 30 miliona le paketi a le Pasifika Futures mo tausaga e tolu (10 miliona le tausaga) e faatino ai nei polokalame.
Na saunoa Debbie e maimau pe ana tele se vaega tupe sa ofoina mai e le Malo e faasavalia ai le polokalame o le Whānau Ora, semanū e lava telē ona faatupe e le Pasifika Futures mau polokalame eseese sa ofoina mai e faalapotopotoga eseese mo le manuia lautele o aiga Pasifika. E 31 Faalapotopotoga, Sosaiete, Asosi ma Ekalesia o le a tuuina i ai le tinoitupe pe tusa ma le $22 miliona mo le isi lua tausaga e faagasolo ai polokalame eseese mo le atinaeina o aiga Pasefika.
E tolu fonotaga sa faafoeina ma na amatalia mai le hall ekalesia First Church, (Dunedin) i le aoauli, ona sosoo ai lea o le fonotaga i Racecourse Road, Broomfield (Kalaiesetete) i le afiafi ae faaiu i le aso na sosoo ai i le aai o Invercargill. O nei fonotaga sa au atu iai aiga Pasefika o lo o resitala i le polokalame o le whānau ora e tulimatai ma taulogologo atinaega i aiga o lo o fia maua se fesoasoani ma tufa mai ni o latou lagona faatasi ma ni fesili e fia malamalama ai auā se manuia lautele o le tausiga o aiga aemaise lava fanau.
O nisi o manatu faaalia e le mamalu o le atunuu e faasaga i faafitauli o feagai ma tagata Pasefika o le:
Fesoasoani i le itu tau aoaoga mo le manuia lautele o le fanauiti e oo atu i tupulaga talavou ma ē matutua ina ia maua faailoga ma tusipasi i mataupu eseese.
Itu tau tupe, ua utiuti le faasoa ma taugata le soifuaga.
Soifua maloloina – manaomia le pa‘ū o tau o meaai mo le soifua maloloina, leai se totogi mo fomai faapitoa, ma ia lava le tomai mo le faaliliuina o le gagana mo latou e le lava le malamalama i le gagana Peretania
Faalaloina o mea totogi (loans) mai ia lava le faasoa ma le teuina o tupe mo le lumanai. Ia lava le aoaoina o tagata Pasifika i le itu tau sefeina o tupe ma paketi ma faatau a le aiga ina oo atu i le isi vaiaso o loo lava pea le faasoa.
Ia lava le tomai o tagata Pasifika ina ia tulai e avea ma taitai totonu o le Malo, alalafa, Ekalesia, Faalapotopotoga ma Aiga. Ma ia unaia le tupulaga talavou i nei avanoa taitai i totonu o Aoga.
Sa soalaupule foi ni auala e foia ai tele o faafitauli faaalia totonu o aiga. O le numera tasi o nei faafitauli o le itu tau tupe le mafuaaga ua tau afaina ai le soifua maloloina ma le ola laulelei o tagata Pasefika.
Ua tuufaatasia nei e sui o le matagaluega Pasifika Futures se lipoti mai finagalo felanulanuai auā le silafia e le Malo o mataupu ma‘oti sa faasoa i nei fonotaga aemaise o faafitauli ma mataupu o loo tele ina afaina ai le toatele o aiga Pasifika totonu o le atunuu. O le faamoemoe o le a faagasolo pea nei fonotaga i aai i Mātū o le atunuu auā faatalatalanoaga ma fetufaa‘iga auā se fesoasoani mo le manuia lautele o aiga ina ia malamalama lelei le Pasifika Futures ia latou auaunaga, auā o latou nei o loo nafa ma le lipoti e tuuina atu i le Malo mo sa latou fesoasoani mo nei aiga vaivai i tausaga o i luma.
Sa auai atu i nei fonotaga nisi o le mamalu o le atunuu faapea aufaigaluega a le Atua ma taitai mai komiuniti eseese, ma faamalosiau foi e uiga i le faigata o le soifuaga mo aiga Pasifika i lenei vaitau i totonu o Niu Sila. Sa faatāuaina tele le toaaga e talatalanoa faatasi, aemaise le mafutaga o mātua ma fanau i totonu o latou lava lotoifale, ia aua ne‘i motu le laina o fesootaiga o mātua ma fanau, o le ola maloloina lelei lena i totonu o se aiga.
O le faapolokalamaina o nei fonotaga o le a faasolosolo atu ai i aai pei o Ueligitone, Hamilitone ma Aukilani auā le soalaupule o mataupu faatautaia e sui o le matagaluega o le Pasifika Futures mo le malamalamaga lautele o tagata Pasifika i atinaega mai lenei polokalame o le Whānau Ora mo le manuia lautele o tagata Pasefika i totonu o Niu Sila.
