E silia ile 10 aiga Samoa o le’a nonofo i maota fou i totonu lava ole masina lenei ma faasolo atu ai ile masina fou, i lalo o fesoasoani a le aualofa o alii ma tamaitai mai Amerika.
O le polokalame lea o loo faatino e le Susuga Bishop Vaoga, ma le Uarota a Vaitele. Ua latou galulue faatasi ai ma talavou a le Ekalesia a Iesu Keriso o le Au Paia o Aso e gata ai mai Amerika.
Na talanoa ai le Susuga Bishop Vaoga, e tusa ma le 23 alii ma tamaitai nei, e tofu lava le tamaititi ma le 2afe tala, e faamealofa ile fauina o maota o aiga nei.
O aiga ia na filifili mai lava e le Epikopo o le Uarota, e faaalu sa’o iai le alofa mai o talavou, a Amerika.
Ma e iai foi isi maota faapea, e 10 o le’a auaua’i lava ona fau faasolosolo. E le gata o le falenofo, faa fale talimalo ae ua fausia foi ma le faletaele ma le faleui.
O le vaiaso na te’a nei, na faapaia ai le mae’a o lea galuega, e ui ina fai sina tuai ona faatino o le lotu o le faapaiaga, peita’i, sa molimauina le agaga o le galulue faatasi a le uarota a Vaitele.
Na talanoa ai le tina ia Kome, o le fanua lenei o lana fanau, ua leva ona taatia.
Talu ai sa iai foi faafitauli ile faiga o le auala agai ane ile fanua. Ae nate faafetaia lava le fesoasoani a le latou ekalesia, ua fofo atu ai ma lea faafitauli. Aua sa iai lava le fanua, lenei, ae ese lesi o latou aiga sa nonofo ai.
Peita’i sa le’i faigofie le taufaiga ole auala. Na oo atu lava ile ofisa ole malo, o gafa ma nei fanua, faapea foi i leoleo, ma sa oo atu lava ina saili se fesoasoani a le loia.
Lea ua afua ai ona vave maua se mapusaga o lenei fanau ma le tau sailiga ose auala e faigofie ai ona maua se auala e aunoa ma le vevesi o ni aiga.
Ua maitauina e le tusitala, o le aiga o lo o ui atu ai le auala ole fanua, i o latou autafa, e lolotu foi ile ekalesia lava lea e tasi.
Ua maua foi e le tatou lipoti, afai ae tupu se faalavelave faafuase’i i le maota fou lea pei o se mu, e le faigofie ona tau faaofiofi atu iai se taavale lapoa ma lautele mose fesoasoani, ona o le vaapiapi.
Peita’i ole faafetai tele a le tina ia Kome ma lona aiga, ua mafai ona sao atu ni taavale ile latou fale.
E umusa ma faapaia ane le galuega ile afiafi, e leai se moli eletise ua tosoa, ma o iai le faamoemoe o le tina, o lesi lena o laasaga ole taumafaiga a lona ia lava aiga, o le tosoina lea ose moli eletise.
O le vaiaso nei foi lea ua lamalama faai’u ai le isi galuega ole maota fou, i Vailele, o fausia e fanau talavou mai le Setete o Utah.
Na amata le galuega lea i Vailele ile vaiaso talu ai, ma fesoasoani ai talavou o le Uarota a Vailele lua.
E pei ona molimauina e galulue faatasi lava le aualofa a tina ma talavou. Pei ona talanoa ai le Epikopo, o le tiute o tina o le kuka ma faaleleia faalaulelei tafa fale, ae ole vaega talavou o le Uarota i Vailele, o le fesoasoani lea i alii ma tamaitai palagi mai Amerika.
O tupe o loo fau ai le maota lea i Vailele, na saili tupe ai fanau talavou mai Amerika.
O le faaiuga ole vaiaso nei, e faamae’a ai le maota, ae faagasolo mai foi isi foi kulupu mo isi maota ua mana’omia ona suia mai aiga lima vaivai ole Ekalesia.
