Maua faleoloa ma fale talavai faatau meaai mo pepe ua leaga

E lē o toe nofonofo le vaega o taumafa tatau i le matagaluega o le soifua maloloina i le alu o suesuega i le tai tolu masina o le tausaga, ona o le puipuia o le saogalemu o le soifua o tagata lautele mai oloa tau taumafa mai fafo o loo faatauina e faleoloa i le atunuu.
O le masina o Aperila e oo mai ia Iulai o le tausaga nei na alu ai le isi asiasiga lea e 52 faleoloa tetele i Upolu ma Savaii na afea. Na asia ai foi ma fale talavai i le taulaga o loo faagaioia faapisinisi i se tulaga tuma‘oti.
O le taunuuga o ia suesuega na iloa ai o loo faatau e ia faleoloa ma faletalavai oloa mo meaai a fanau pepe ua uma lē aogā. O oloa ia e pei o apasusu pauta ma meaai o loo tuuapa ma tuufagu.
O nisi faleoloa o loo faatau apasusu ua omoomo ma elea ae e lē faatagaina i le tulafono o le saogalemu o taumafa e faatauina e faleoloa.
O le faanoanoaga o le matagaluega e pei ona faaalia e le Pule sili, le faletua o Palanitina Tupuimatagi Toelupe, o le faataugofie o nisi o nei oloa ina ia vave ai ona taulia ma tosina atu ai foi le toatele o tagata e faatau.
O faletalavai sa latou faatauina lava fagususu ma matasusu faapea meaai mo pepe ae ua uma le taimi sa tatau ai ona faaaoga ia oloa.
“O le fautuaga ua ave iai latou e ana faleoloa ma fale talavai e tatau ona siaki lelei oloa i taimi uma ma vaai poo a masina ma aso e uma ai le aoga, ona vave aveese lea e le toe faatauina.
O se molimau a nisi e iai faleoloa tetele e masani ona fai a latou pa‘ū i le tau o oloa tau taumafa, ae o le tele o ia oloa ua toe tolu pe fā foi aso ona uma lea o le aogā poo ua expire.
O popolega o le matagaluega o le soifua maloloina o nisi o faiga faapea a le au faioloa o le uma o le aso sa tatau ai ona faaaogā ia oloa tau taumafa ae o loo vaaia lava o loo faatau faataugofie i le atunuu.
O loo taoto nei i le Palemene se tulafono a le matagaluega o le soifua maloloina o le a faamalosia ai le siakiina o soo se oloa tau taumafa mai fafo ina ia mautinoa o loo saogalemu mo le faaaogāina e tagata.
O le a tinou ai foi kamupani o loo okaina mai oloa tau taumafa mai fafo e faamalosia i kamupani o loo aumai ai nei oloa le tatau ona usitaia ma tausisia tulafono o le saogalemu ma le puipuia lelei o taumafa i Samoa.
Talu ai nei na faasā mai ai e le matagaluega o le soifua maloloina ona toe faatau e se faleoloa le ituaiga o le apa eleni o lona igoa o le Manaia ona ua lē saogalemu.
O se aiga i Fagalii na latou molitai i le matagaluega ni apaeleni o le Manaia na tatala atu o le a faaaogā, ae maua ai i totonu o i‘a ni anufe.
Ua lē toe vaaia nei foliga o lea apa eleni i faleoloa i le atunuu. E iai foi nisi apa eleni ua faasā ona o le faaletonu lava ona saunia.