O se alii na falepuipui i le gaoiga o le penisione a tagata matutua o le NPF lea ua agai i le Toomaga mo ē Puapuagatia atoa ai ma le Ofisa o Leoleo, ona o le faapipii solo e le faaputugatupe mo le lumanai manuia o le atunuu (NPF) o lona ata i fogafale uma o lea ofisa faapea ai le Fale o le NPF lea e ta‘ua o le Plaza i le taulaga lava o Apia.
O lea alii e suafa ia Sione Taateo, lea ua mae‘a tuli le faasalaga e tolu tausaga ona na faamaonia o ia ma se isi tagata na ave faagaoi se tupe o le penisione a tagata matutua i ni nai tausaga ua tea. O lea la ua magalo mai ae ua lua nei vaiaso o faapipii lona ata ma le lapataiga ua faasa ona toe vaaia o ia i nofaga nei a le NPF.
Ta‘ua e lenei alii e lē iloa pe aisea lava ua faia ai lenei faiga e le faaputugatupe o lea ua mae‘a tuli lona faasalaga i lana solitulafono na fai ma e na o le faamataga o ia e lea faasilasilaga.
Faaalia foi e lenei alii ua lua vaiaso talu ona oo atu i Leoleo ona na suesueina o ia i le leiloa ai o se telefoni feaveai a se tamaitai e faigaluega ai i lea ofisa ma na ta‘u ai e lea tamaitai i leoleo sa vaai i le alii lenei o Taateo i le nofoaga tonu lea na masalomia le gaoia ai o lana telefoni. Faaali e lenei alii lona faanoanoa tele ona o nei tuua‘iga ma ia ta‘u atu i Leoleo e lei gaoia se telefoni feaveai.
O le faamatalaga a le Pulega o le NPF ina ua tapa se finagalo i lenei faasilasilaga faalauaitele na ta‘ua ai i se latou pepa o faamatalaga, ua vaaia soo e meapueata o puipuiga a le NPF lenei alii o fealauai solo lava i nofoaga nei a lē o le ofisa o le NPF o le fale fou lea o le NPF Plaza. E lē o agai atu foi e tapa se fesoasoani i se mataupu tau i le NPF ae na o le fealuai solo lava. O le mau a le NPF o i latou e ana fale nei e lua ma e pule lava i latou i le gaioiga e faia ai e pei ona faapipii ai le ata o lenei alii ma le lapataiga.
Ta‘ua e le Pulega e leai ma se mafuaaga e fealuai solo ai fua lea alii i ia nofoaga a le faaputugatupe ma e talu ai o lea na faamaonia lana solitulafono i le ave faagaoi ai o tupe mai i le NPF i tausaga ua tea, o masalosaloga nei ua mafua ai ona faia lea tulaga.
Faaalia e Taateo o ia ua agai i Leoleo ae sau le tala a le Ofisa o ia lava e saili se auala e faaali ai lona manatu ua oia lana aiā tatau e le NPF ae e lē faatinoa e leoleo lea tulaga.
O lea la ua agai ai nei lea alii i le Toomaga mo ē Puapuagatia e saili fesoasoani ai ona o le manatu e tatau ona ave i le tulafono le NPF i le faaleaga o lona tagata e ala i lenei faasilasilaga ua faapipii solo i fale o le faaputugatupe.
