O le manumalo mataina a le Samoa A i ‘ai 27-18 a Tonga A i le malae a TG Milner i Eastwood i Sini i le taaloga o le Ipu a le Pasefika na vaaia ai le malolosi o pue a ‘au e lua. O le taimi muamua lenei na toe vaaia ai i Sini le va masani o atunuu nei i taaloga i le itu tau faatautino. Na leai se vevesi poo se misa na tulai mai ae o le osofai e le isi ‘au o le isi ‘au i le faaaogāina o le pue malosi na maofa ai tapuaiga e lua. Na moomia e Samoa le manumalo i le taaloga lea ina ia faigofie ai se sailiga o so latou avanoa i le suega siamupini i taaloga o totoe o lana pulu ma Argentina ma ACT XV.
I le amataga o le taaloga i le vaiaso talu ai na kiki lava le polo amata ma amata faatautino loa ‘au e lua. O le galulu o pue i le fetaia‘iga na matuā manaia i le maimoa a le aumatamata i le vaai atu i le maua lelei o se pue ma alu ifo i lalo se sui o Samoa poo Toga foi. E toaitiiti le tapuaiga a Samoa ae toatele Toga ae lei faavaivai ai le ‘au. O le mae‘a o le luasefulu minute muamua sa vaaia loa le amata fesuiai o taalo a le Samoa A ma sao atu ai i le laina luasefululua a Toga.
Na umi o osofai le Samoa A ae puipui lava Toga ma o le toe agai atu i Sisifo na faapa‘ū ai loa i luga o le laina ma sikoa ai le kapeteni ia Maselino Paulino mo le sikoa muamua e lei ova le kiki 5-0. Na vave le tali mai a Toga i le isi lua minute ina ua osofai malosi la latou foueki ma sikoa ai ova le kiki ma sili e 7-5 faaopoopo i ai ma le latou sala 10-5. I le ‘afa faaiu na sikoa la tatou fulupeki mo ‘ai 10-10 sosoo ai ma le sikoa muamua a la tatou numera fitu ia Oneone Faafou mo ‘ai 17-10 a Toga. Na toe maofa foi i le toe sikoa faalua o Oneone Faafou mo ‘ai 24-10. O le taimi lea na sui atu ai le ‘afa ia Shane Tetzlaff o Magiagi ma Moataa lea na ova ana kiki e lua o sikoa ma le sala mo ‘ai faaiu 27-18. O le ‘afa muamua na misi ni a tatou sala e ono latalata i le pou.
O loo i Canberra nei le Samoa A auā taaloga ma Argentina ma ACT XV a manumalo uma ai ua sao i luga o suega siamupini. Saunoa le faiaoga ia Mailo Potu Leavasa, e lē o toe faigofie le laasaga ua iai nei pau le faamoemoe o le saga faaauau o le taitaiga lelei o le foueki e Maselino Paulino, Falemiga Selesele ma Oneone Faafou, Shane Tetzlaff ma le sui muamua o le Manu Samoa ia Anitelea Tuilagi faapea Rudy Meredith.
