Ua faamauina nei ile molimau a tagata ma Ekalesia i Sini Niu Sa Uelese le avea o lenei Tutoatasi ma vaaiga uigaese ma aupito matagofie ile talafaasolopito o faamanatuina o lo tatou Tutoatasi i fafo mai o Samoa. E silia ma le 10,000 tagata Samoa na aofaga potopoto atu i le taualuga ole faamoemoe ile Aso Gafua, 13 o Iuni ile Whitlam Centre e molimauina le Samoa Day.
Ae peitai ole po ole Aso Faraile, 10 o Iuni na amata ai faafiafiaga o le Fu‘a a Sini sa faatautaia ele Fono Aoao a Tagata Samoa i le siva aloaia (Independence Ball) na faia i le Maota matagofie o le Roma Function Centre i Liverpool. Sa vaaia le faatumulia ole atunuu ise po ese na ulufale atu ai malo, o faatali mai pueata ma Video ile laupapa faapitoa o iai le pine ale Fono ma le Fu‘a a Samoa.
Ole valaaulia faapitoa na aofia ai le Konesula o Samoa le Afioga Fonoti Manogiamanu Etuale Ioane male faletua, aemaise le Pulenuu o Liverpool ia Mayor Ned Mannoun ma nisi ole aufaipisinisi ma faauluuluga o Faalapotopotoga, faapea Muliagatele Oketi Vaifale Taulaga ole Miss Samoa NSW, ma aoga e pei o Avele, Sanele, Sagato Iosefo, Sagata Maria ma nisi. Ole faaili mālie ale Teuila na faafiafia ae ole aufaipese ‘Acapella’ Klapa Samoana mai Niu Sila na latou usuina le Vii ole Fu‘a. Sa sosoo ai male faafeiloai ale f
ofoga ole po le afioga Vui Masinamua. Sa taitai ele susuga ia Rev Iakopo Leleimalefaga se tatalo amata e faatepa ai le atunuu ile sao a tuaa mose saolotoga. Sosoo ai male Faafeiloai male Faafetai ale Afioga ile Peresetene ale Fono Aoao, afioga Leilua Jerry Uesele ile maave ole aofia na malaga mai i Niu Sila, Samoa ma Setete eseese o Ausetalia e aofia ai Canberra ma Melepone.
Ose faamalo foi male faafetai i paaga e tele ua valaaulia ele Fono e afifio mai e faamanatu faatasi le faamoemoe o Samoa. Sa vaaia le faafiafiaina ole atunuu na auai i vaega e tolu ole taumafataga aemaise le anoanoai o uaina eseese ma vaitaumafa suamalie male ava malosi. Ole ausiva iloga ale Matavai Cultural Group na mataina foi ana fiafiaga a‘o lei faamanuiaina le Keke ma tatala ai le filialii. Ose vaaiga mataina ole ta‘ape fiafia ole aofia, e aunoa mase gase pe gugulu.
Ole Aso Sa na sosoo ai na masii atu ai loa le atunuu mole sauniga lotu autu ile Hall ale Asofitu Tutoatasi i Minto ile itula 4pm. Ose vaaiga mataina le papa‘e uma mai o laei o aufaipese ma aulotu tuufaatasi. Ole taimi muamua lenei ua faatinoina ai ele Fono a Ekalesia Soofaatasi le Lotu o le Fu‘a ae tapenaina lava ele Fono Aoao taumafa ole iputi ma teutusi mole aufaigaluega e pei ona sau a‘i mai aso ua tea.
Ole taunuu atu ole Afioga ile Konesula ma lona faletua na amata ai loa le sisiina ole tagavai a Samoa ma Ausetalia a‘o tāina ele faailipu ale Asofitu mai Mt Druitt vii ole saolotoga o atunuu e lua.
Ole Afioga ile Sea, Rev Savaii Loto o ia foi ole taitaifono ale Fono a Ekalesia Soofaatasi na taitaiina le sauniga faapea ai le lagolagosua ale Toeaina, Rev Kolia Kolia ole EFKS Campbelltown male susuga Rev Tanifa ole Metotisi.
Ole mau ale lauga ale taitai ole sauniga Rev Savaii Loto na ia faatusa ai le atoaga ole 54 Tausaga ole Tutoatasi o Samoa ile savaliga ale nuu ole Atua mai Aikupito mo Kanana.
Na logomalie siufofoga o aufaipese ale EFKS male Metotisi na auai. Sa faamanuia foi le Aufaigaluega ile Aso Faapitoa ole Atunuu ma ona tagata, aemaise o galuega lelei ale Fono.
Na mae‘a ona see lea ole atunuu auā le taliga ole sua ma faaaloaloga masani o aso faapenei na saunia ele Fono Aoao a Tagata Samoa i Niu Sa Uelese.
