Ua manino nei le faailoa o le manaoga o le faletua ia Seuoti Alofipo Sheryl Fialuma Siliniu Muagututia i le itumalo ma lona nuu i le fia tauva ai i le sailia o le tofi faipule o Gagaemauga Nu 2. Ma ua taoto ai le talisapaia e le afioaga o lea sui auā ua tele lona sao ma lana tautua i totonu o le afioaga.
Ua taunuu nei la i fanua o Aotearoa le Komiti Faafoe a le sui tauva faaolioli, le faletua ia Seuoti Alofipo Sheryl, e ala i lana sailiga seleni auā ana tapenapenaga mo lea faaamoemoe ia Mati i le tausaga fou.
E toa sefululua le aumalaga a le Komiti Faafoe na malaga mai Samoa auā lenei faamoemoe i le faaiuga o le vaiaso nei, lea o le a faia i le po o le Aso Faraile le social i le Le Tausala Bar ae o le Posiva e faia lea i le Otara Music and Arts Centre (OMAC) i le taulaga faatau a Otara.
Ua faatagisia ai e le sui tauva ma le Komiti Faafoe le lagolago a alo ma tamafanau a le itumalo ma lona nuu ina ia fesoasoani i le sailiga seleni e pei ona asa mai ai ala o le mativa. O le faletua ia Seuoti Alofipo Sheryl na soifua a‘e i totonu o Niu Sila ma aotauina ai i tulaga o aoaoga; sa galue foi i nisi o kamupani, ma malaga ai loa i Samoa i le tausaga e 1995 auā le tausiga o lona aiga.
Na galue i Samoa i le Maligi, Samoa Shipping Corporation, avea ma sui failautusi ia Joe Keil a o avea ma Minisita faatasi ai ma le Polynesian Airlines.
O loo tautua nei i lona itumalo ma le nuu i Saleaula ma Salamumu i le la pisinisi ma lona alii ia Alofipo Uivaa Vaoga Lusi Muagututia e ala i le faleoloa, falepa‘u, faletalimalo faatasi ai ma vaa fagota, ma o nei auaunaga uma ua telē se avanoa ua maua ai galuega a alo ma fanau i totonu o le itumalo. Aemaise ai ua fesoasoani mo le atinaeina o aiga faapea ekalesia. O loo tele foi le faatoaga e ala i le pa povi o loo faigaluega ai nisi o tupulaga a le nuu.
Ua mae‘a foi ona faataoto nisi o fuafuaga faatasi ma le komiti ma le itumalo, ina ia unaia le tulaga i aoaoga, faapea aoga afiafi a le fanau. Ua taulai foi le silasila i le maua atu lea o ni laptops ma computers auā le faaleleia o le atamai i le poto salalau, ina ia lui ai foi fanau i mea tau aoga, auā e leai se isi faitotoa e ulu i ai soo se aiga i se tama poo se teine ae faaeaina.
Ae lē gata i lea, o loo tele lava avanoa e taumafai atu ai nisi o pisinisi e faatosina atu ai turisi ma maua ai foi nisi galuega mo le itumalo ma le afioaga.
O le talitonuga o le komiti ma tamalii o le afioaga o Saleaula ma Salamumu, o le faletua ia Seuoti Alofipo Sheryl na aotauina i atunuu i fafo, o loo iai lona atamai e faaaogā ai alaga‘oa o loo i totonu o Saleaula mo le manuia o aiga ma tagata lautele.
Ae lē gata i lea, o loo silasila le komiti ma le afioaga i lona soifua talavou e faigofie ona mo‘emo‘e i mea e faatino o le tofi faipule, ma o loo talavou foi lona mafaufau e faufau ai nisi mea fou auā le manuia o le itumalo.
Ua galulue faatasi foi ma le afioaga o Salamumu auā le faaleleia o auala galue e pei ona faaletonu. O loo manaomia foi le faaleleia o le apitagalu auā le malupuipuia o aiga ma fanau.
Ae na saunoa le faletua ia Seuoti Alofipo Sheryl, o le tofi o le mea mai le Atua, na saili foi i le Alii e aumai se tofi lelei e aogā mo tamaitai i totonu o Samoa ae lē gata i lea mo a taeao.
O ona tuaa o Alofipo Manusamoa La‘auli Siliniu Lafo Lafo, ma le faletua ia Toaivao Fulisia Alofipo Sapa Siliniu. E toalima i latou, ae o ia o le lona tolu o le fanau lea ua finauina le nofoa o Gagaemauga Nu 2 i faalagamaea a le atunuu i le palota o le tausaga fou, 2016.
