O le talosaga mo se poloaiga a le faamasinoga e tuuina atu i le afioga Peseta Vaifou Tevaga‘ena, e ulufale ai i le ofisa ma le lotoa o le kamupani nonu o le Local Partners and Associates (LPA) i Vaitele ua folasia ai e le alii Faipule poo le Minisita lagolago o le Matagaluega a le Palemia ma le Kapeneta e ala atu i lana loia, nisi o tuua‘iga faasaga i faatonu o le kamupani ma le afioga i le Fofoga Fetalai, Laauli Leuatea Polataivao.
O se tasi o alo o le alii faipule sa lisi lona suafa o se tasi o faatonu ma faisea o le kamupani, peitai ina ua manao le atalii o Peseta e aveese lona suafa ae tuu i ai lona tamā, sa finau le loia a Peseta le afioga Leuluaialii Olinda Woodroffe, sa faia uma feuiuiaiga e tusa o le tulafono lea sa sainia ai ni pepa i le tamaitai loia o Maiava Visekota Peteru o le loia a le kamupani.
O loo teena e faatonu o le kamupani le susuga Apulu Lance Polu ma Martin Schwalger o Peseta o se faatonu, ma ua aliali ai ni tuua‘iga o se gaioiga faaalatua na faia e le faipule i faamaumauga ma pepa ua aveesea ai le suafa o lona atalii ae tuu i ai lona suafa.
O loo teena e Peseta lea tuua‘iga ma o le mafuaaga foi lea o le oo o le mataupu i le faamasinoga e pei ona talosaga ai Peseta i se poloaiga a le faamasinoga e tatala ai faitotoa o le kamupani ia te ia ona o ia o se faatonu.
O le Aso Faraile ua mavae, 11 o Tesema 2015 na fofogaina ai le talosaga a Peseta ma lana loia mo se poloaiga. Na faailoa ai e le afioga Leuluaialii Olinda le loia a le alii faipule nisi o faamaumauga ua maua i tupe maua a le kamupani mai le faatauina o le nonu i atunuu i fafo. O ia tupe e oo lava i le 400 afe tala Samoa.
Na faaalia e le loia i lana folasaga o le faatuina o le kamupani i le igoa o le Local Partners and Associates na iai ma se isi kamupani na fausia i le igoa o le Samoa nonu Delights sa faaaogā e maketi ai le faatauina i fafo o le sua o le nonu.
O le igoa foi sa auina mai ai tupe mai fafo i le faatauga o le nonu, lea sa ese le teugatupe i se faletupe i Samoa sa faia i lalo o le Samoa nonu Delights.
Na faailoa foi e le loia o nisi o tupe sa tala (cash) ma totogi atu i le susuga Laauli Leuatea ma Apulu Lance Polu. O se isi foi tupe na tala (cash) na totogi atu i se isi tagata e pei ona ta‘ua e Leuluaialii Olinda o le faletua o Laauli. Na tuuina atu ai ma se fesili e le loia i luma o le faamasinoga e ala i lana folasaga (submission) pe faamata o totogi ni lafoga i le Malo e ala i vaegatupe na maua mai i le faatauina i fafo o le nonu.
O se tasi o folasaga a le loia a Peseta na tulai ai le loia o loo tulai mo i latou o loo faasaga i ai le talosaga mo se poloaiga, le susuga Semi Leung Wai ma ia faailoa i le faamasinoga o vaega ua faailoa e le loia a le itu talosaga o ni mau e maua mai i tala faalogo (hearsay) peitai na ta‘ua e Leuluaialii Olinda Woodroffe o loo iai faamaumauga ua tuuina atu e Peseta ia te ia o loo faamaonia ia vaega ma e lē o ni tala faalogo, aemaise e lē nofonofo tuu i totonu o lana folasaga mo le silafia e le faamasinoga.
O loo finau foi le loia a le faipule o le tuuina atu ia Peseta o sea e lona atalii e avea ai ma faatonu o le kamupani, na faia e tusa o aiaiga o le tulafono ma o loo faamaonia foi le faia o lea fesuiaiga ina ua tapa e le loia a le kamupani o Maiava Visekota se totogi o le galuega na sui atu ai ia Peseta sea o lona atalii. O loo tālia nei se faaiuga a le faamasinoga.
