Ole alii siamupini o Brandon ua sisii ona lima ina ua manumalo - Photo: ScottieTPhoto

Ole alii siamupini o Brandon ua sisii ona lima ina ua manumalo – Photo: ScottieTPhoto

Ua mae’a tuuga mamao ale Samoa Events lea na malaga atu ai le toatele o tagata taalo i Samoa ile vaiaso na tea nei ile tuuga Uila ole Ford Tour of Samoa. E ono aso ole tuuga na amata i Apia ile Aso Gafua ae na toe tini lava i Apia ina ua mae’a ona taamilo i Upolu ma Savaii.

Ole alii loia mai Aukilani o Brendon Madden-Smith ua faamanuiaina ile manumalo. O lona taimi taamilo i Upolu ma Savaii e 11itula, 55minute, ma le 16sekone.

O vaega lenei ole tuuga:

Aso Gafua (Stage1), 62km, Apia – Lalomanu 2itula 07minute

Aso Gafua (Stage2), 40km, Lalomanu – Maninoa 1:23:22

Aso Lua, Maninoa – Mulifanua 1:17:27

Aso Lua, Salelologa – Manase 58minute 24sekone

Aso Lulu, Manase – Asau 37kms, 55minute 33sekone

Aso Tofi (Stage1), 55km, Asau – Taga 1:39:15

Aso Tofi (Stage2), 45km, Taga – Amoa 2:07:15

Aso Toonai (Victory Ride), 47km, Amoa – Apia 1:27:00

E matautia le uigaese ma le mataina ole tuuga o lenei tausaga. E 42 tagata tietie ole tuuga ole 2017, mai le 22 ole tausaga ua tea nei. Na amata ile 6 ile taeao ole Aso Gafua ma agai atu ai i Lalomanu. E na ole 2 itula na tuli ai e uila saoasaoa le mamao lea.

Pau le faigata ole faaletonu o auala ile va o Apia ma Falefa, ae na pasia loa le Afu i Falefa ona matuā saoasaoa lea ole o a uila. E pasi Le Mafa ma Afulilo e pei ose mea fua le a’e o uila ona ole malolosi o tagata tietie uila. Ole saoasaoa na ausia ile ifo atu i Samusu ma Tiavea e ova ma le 70km ile itula.

Na puupuu le malologa i Lalomanu, ina ia toe faapotopoto le tuuga ona alu ai loa lea i Maninoa.  Na malolo lelei iina mo le po e tasi, ona sauni ai loa lea mo le malaga atu i Savaii.

Na vaeluaina le tuuga i Maninoa, na amata ele vaega telegese le tuuga ile ta ole 5:30 ile taeao. Sosoo ai ma le au saoasaoa ile ta ole 6am. E na’o le itula ma minute na tuliloa ai le uafu mai Siumu. Ae e lei atoa le itula na alu ai le tuuga i Manase mai Salelologa. E fai lava si saoasaoa o uila.

Ile Aso Lulu na uia ai Aopo ile agai atu i Asau. E na’o le 58 minute le umi na tuli ai lea mamao.

Sosoo ai ma le aso lona fa ole tuuga mai Asau i Amoa, ae malolo i Taga mo se 20 minute. Ole ta ole lima ile vaveao na amata ai  le vaega telegese ole tuuga, sosoo ai ma le vaega saoasaoa ile ta ole 6 ile taeao ae na taunuu faatasi uma lava ile nofoaga i Taga.

E lei umi le malologa iina, ona tuli loa ole vaega lona lua mai Taga i Faga. Na solosolo lelei le tuuga ile itu atu lea i Gataivai ma Palauli, ma agai atu ai i Faasaleleaga.

Na malolo lelei ile Aso Faraile, ona sauni malaga ai loa lea mo Apia. Ole aso mulimuli lea ole tuuga na poloka atoa ai e uila le auala ile uafu i Salelologa, faapea ai ma le auala mai Mulifanua i Apia. O tulaga uma ia ole taumafaiga ale Samoa Events ma lana tautua ile aumaia o tagata e toatele mai fafo e tausinio i tuuga i totonu o Samoa.

Ole tamaitai o Rebecca Marley o Niu Sila na mua ile tuuga a tamaitai. Ole lona tolu ai lea o ona manumalo ile tuuga lenei  ale Samoa Events, na manumalo ile 2015, 2016 ma le 2017. E toatolu mai Samoa oloo nonofo i Samoa na auai ile tuuga Ae toa fa Samoa mai Niu Sila na malaga mai e tausinio. Ole alii Samoa o Wally Collins na tu tolu. E lelei tele lana vili. Sosoo ai ma Darren Young, ma Daniel Afoa.

Comments

comments