E lei faavaivai le taupati atu o le atunuu i le lotoā a le G-Mana Wholesale Autos i Otahuhu, e faafofoga ma molimau poo ai o le a sola ma faailoga tai afe e pei ona faimeaalofa ai le alii pule ia Galumalemana Tai Galumalemana ma le aufaigaluega ia i latou uma sa faatauina taavale ia Iulai.
O tagata Tonga, Samoa ma Fiti sa tumutumu ai le lotoā i le aoauli o le Aso Toonai lea e latalata i le 300 i latou sa molimauina lea faamoemoe. Sa amata i le sauniga puupuu na saunia e Patele Falaniko Stowers ma faagasolo ai loa le polokalame e le fofoga o le aso le alii o PJ Galumalemana.
O le malo faaaloalogia sa auai o le alo o le atunuu ia Alafoti Faosiliva lea sa ia laasia le laina sikoa a le Manu Samoa i le taaloga ma le Olopeleki. Ma o ia foi sa nafa ma le se‘iina o suafa o i latou na alu igoa i le Se‘i faatasi ai ma le susuga i le aoao ia Tavai Meni o le sui mai le Radio Samoa. Ae o le leitio a le 531pi sa fofogaina suafa o i latou ua faamanuiaina.
Sa faapea foi ona faasalalau tuusa‘o i luga o le siufofoga o le Radio Samoa 1593 lenei faamoemoe i le polokalame a le afioga ia Savea. O le ausiva a le La o Samoa ma le autalavou a le Ekalesia Katoliko mai Onehunga faapea le faili a le G-Mana Flame na faafiafiaina le mamalu o le atunuu. Sa vaaia le sagisagi fiafia o le aiga o le alii pule ma le aufaigaluega i le gaseseina o le taumafataga.
O le sini autu lava o le aso, o le faalogologo poo ai o le a suipi i le $4,000 o le faailoga muamua. Na lē toe iai se pisa ina ua tulai le alii o Alafoti Faosiliva ma le aoao ia Tavai Meni e vili le masini i le numera muamua i fafo, na lauina numera lautogia e lima ma faamanuiaina le tamalii o le atunuu ia V Mika/Siase Fepuleai i le faailoga e $4,000.00, Aiotaua Povey i le $3,000, S Poese/K Mausia $2,000, Ieti/Otilia Tauasa $1,000 ma Ofa Ki Mineli i le $500, e silia i le 40 suafa sa faatauina taavale ia Iulai ae sa maua uma lava a latou faailoga tupe e tai $50.00.
Se’i a le Hemderson Cars LTD
Ae lē gata i lea o le tautua ma le auaunaga a le susuga ia Shiu i le faletaavale a
le Henderson Cars, ua leva foi ona faatali i ai tagata mai Tonga, Samoa ma Fiti poo ai o le a fealuai i le van fou e 10 nofoa o le faailoga muamua, faatasi ai ma faailoga tupe.
O le faapitoa lenei a Shiu ma le Henderson Cars ua leva ona fuafuaina mai pe a mae‘a le taaloga a le Manu Samoa ma le Olopeleki ona faataunuuina loa lea, auā o ia sa lagolago malosi i le faasalalauina tuusa‘o o taaloga mai lafanua o Samoa.
E maeu foi le faatumulia o lea tautua i le Aso Toonai ua mavae i le mamalu o Samoa faapea tatou uso mai Tonga ma Fiti, lea e silia i le 300 i latou na auai. Sa faafiafia ai le ausiva a le Tatau Dance Group faapea le DJ a Seumanu Francis Ioane.
O le susuga i le alii faimeamalie ia Tofiga Fepuleai sa fai ma fofoga o le aso na vaavaalua ma le alii taalo o le Manu Samoa ia Semo Sititi sa fai ma malo faaaloalogia. Sa faapea foi ona faasalalau tuusa‘o i luga o le polokalame a Savea suafa o i latou sa faamanuiaina.
O faailoga tupe e tai selau tala e toalima i latou sa manumalo ai, o Logouili Uiliese, Sitivi/Lesina, Iotua Nauru, Faufousiana, ma Sara Maika. $200 na manumalo ai Fasakanaua Hanau, $300 Matauaina Fuimaono, $500 Tumaua Moana Peti, $1000 o Willie Ianeta Hans.
Ae o le faailoga mulimuli na faateia ai fatu o ē aumau i Aukilani i le sola o le aiga Tonga mai Palmerston North ma le van. Na toe faaiu lea aso i le bbq ma le pa‘umū a Shiu ma ta‘ape ai loa le filialii.
