Ua amata faaaogā le Malumalu fou ole Iupeli ale Ekalesia Faapotopotoga Kerisiano Samoa oloo i lona laumua i Malua ile tau e 17 miliona 300 afe tala Samoa. “Ose galuega e taugata ae ole fua aliali lea ole loto talitonu o tagata lotu ole ekalesia e avea lea galuega ma latou taulaga mo le Atua ma lona finagalo”, na saunoa ai le Failautusi Aoao ole ekalesia, susuga Vavatau Taufao ina ua faatalanoa mo sona finagalo e tusa ma le galuega ua mae‘a i lona taimi ua atoa ai le tausaga o ia tauave le tofi Failautusi Aoao ole EFKS.
Ole galuega lenei mo le silafia sa amata faatino ile tausaga e 2015 ae na alualu tu ua lē gaioi ona o nisi o vala na taia ai le galuega ona o tupe e faatino ai. Ose galuega foi na faitioina ai i latou sa ile taitaiga ole galuega ona ua faafou le maota ole Ioane Viliamu i Tamaligi i Apia ae oloo faia foi le galuega ole Malumalu ole Iupeli.
E lei taunuu ona umusa le galuega ile taimi ole Fonotele i Malua ile tausaga ua mavae ma faaauau ai pea seia oo ina faatoa faaulufale ile taimi ole fonotele o lenei tausaga 2017. A fua iai ua lua tausaga ma masina ae faatoa mae‘a le Malumalu. Ole tausaga ua mavae na oo ai le tau ole galuega ile 13 miliona, peitai e lei mae‘a le Malumalu.
O sao o faiga taulaga ale ekalesia aoao faapea nonogatupe mai le NPF sa faatupe ai le Malumalu e pei ona faaalia e le failautusi. O galuega tetele foi faapea e le mafai ona ‘asa ma lagona musua ma finagalo maaleale e lagalaga pe a iai ni vaega ua lape ai le faatinoga.
Peitai o ia futia ua sola ua fofo‘e faavi ae oso a‘e le loto mimita ma le loto ua faafetai ile Atua ua tini le faamoemoe. Ose Malumalu matagofie lona fausaga i totonu ma ua tele foi le avanoa mo sui ole ekalesia e auai i sauniga lotu pe a usuia le Fonotele i tausaga taitasi.
O luma ane ole Malumalu ole Iupeli ua toe valita auala ma fausia ia lelei, ole vai tuloto i luma ane ua teuteu faamatagofie auā ose mataaga ale ekalesia oloo fafaga ma tausi ai le I‘a Sa poo laumei lea e tutu ai taavale ale atunuu faimalaga faapea tulisi ae solo iai maimoaga.
Ole tulaga ua tulai mai ai le Malumalu ua fai nei ma se tasi o vaaiga faamatagofie mo le atunuu fegasoloai aemaise o tagata malaga mai fafo.
Ole mafutaga a tina ale ekalesia na maoae lo latou sao i meaalofa mo le umusaga ole Iupeli.
E tasi le miliona le latou seleni, o ie tetele ie mao‘i tosi ninii, o taiga ie papalagi, o siapo ma le 20 afe mo manu papalagi auā faaaloaloga mo Malo valaaulia. Ole vaiaso nei oloo faagasolo ai le fonotele i Malua mo le 2017. E tele nisi o mataupu ole a talanoaina ile fono faaletausaga ale Ekalesia EFKS e pei foi ona talanoa ai ma nisi o mataupu maaleale.
