Ua faamautu le lagolagosua a le Kamupani o Fesootaiga tau telefoni o le SamoaTel i le aulakapi Liki a Samoa le Toa Samoa e ala i se feiloaiga ma tusitala i le vaiaso na tea nei lea ua faamautu ai le saga faalauiloa o taumafaiga a le Toa Samoa i le mae‘a ai o ana taumafaiga i le au a Niu Sila ma le Au a Tonga lea faato‘ā mae‘a atu.
O le lagolagosua na faalauiloa a o lei masii ese atu le ‘au a le Toa Samoa na ta‘ua ai e le alii o loo faauluulu i ai le kamupani a le SamoaTel – e tāua ona o le tele o le avanoa e ausia ai e Samoa le maualuga o taaloga faavaomalo o le Liki pe a faaauau ituaiga lagolago o loo mafai ona faamatuu i ai.
O le taaloga muamua – o le a manatua pea i talafaasolopito o lenei foi taaloga lea na tulai mai ai le fetauiga muamua a le Toa Samoa ma le siamupini o le lalolagi i lea foi faagatama le au a le Kiwis a Niu Sila.
O ‘ai o lea taaloga e 50 i le 6 e pei ona manumalo ai le Kiwis ae o le tali a le atunuu i taumafaiga a ana tamafanau na ta‘ua ai e Veletaloola Vaa Ofoia – le Pule o le Maketi ma le Faalauiloa a le SamoaTel, o se matatia maoae lea ma na manino le lelei o le taumafaiga a le ‘au a le atunuu e ui e i lalo ifo o le vaiaso na tuufaatasi ai alo o Samoa o loo nonofo i Niu Sila ma i latou na malaga atu i Samoa nei.
O le suiga o lea malosi na vaaia i le fetauiga ma le ‘au a Tonga i le faaiuga o le vaiaso na faato‘ā mavae atu nei i Ausetalia lea ua vaaia ai le tele o le avanoa e mafai ai e Samoa ona ausia se tulaga maualuga i le taaloga lenei o le Lakapi Liki.
“O le faamuamua ua ave pea e le SamoaTel i taumafaiga faapea a alo ma fanau o le atunuu o le vaavaai lea i le faamuamua ua ave i atina‘e o aiga e pei foi ona iai avanoa tuu atu e le SamoaTel ma avanoa ua maua e fanau e ala i le Lakapi Liki,” o se saunoaga lea a le alii pule o le Maketi.
Sa iai lea tamalii i le uluai taaloga a le Kiwis ma le Toa Samoa ma na ia ta‘ua ai le malosi o le lagolago a aiga o Samoa i Niu Sila i ia alo o le atunuu ma e ui ina sa malolo i le Siamupini o le lalolagi, “….a o ai sa iai se manatu e maua se avanoa o a tatou tama e taaalo ai ma le siamupini o le lalolagi, o ai foi na manatu e mafai ona tali atu tama i lenei taimi na tuufaatasia ai i se taaloga faapea”.
Na fesiligia pe o le manatu o le SamoaTel e faaauau ai ona lagolago e le kamupani taumafaiga faapea a ‘au taaalo o le saunoaga a Veletaloola – o le faaiuga lava o taumafaiga uma a fanau i Samoa e tapa mai ai lava i fesoasoani e pei ona muamua ai lava talosaga i kamupani i Samoa nei, ma o le mafuaaga foi lea o le tali atu o le SamoaTel e ala i se tinoitupe e $100,000 (tala Samoa) lea na faamatuu atu i le ‘au a le Toa Samoa mo ana tapenaga.
E $50,000 se fesoasoani a le Malo o Samoa i taumafaiga a lea ‘au ma o le taimi muamua lea ua mafai ai ona faatino sea fesoasoani a le Malo.
O tausaga ua tuanai sa tele lava ina maua mai fesoasoani a le Lakapi Liki mai i fafo, ae o le uluai taimi lenei ua tāpā ai le fesoasoani i totonu lava o Samoa ona o le utiuti o le seleni maua.
E ui i lea o alo o Samoa i Niu Sila ia na tali mai i le tuufaatasiga o le ‘au lakapi liki atoa ai ma le aofia o tama taaalo i kalapu Lakapi Liki o loo nonofo ma taaalo i Samoa nei, ua vaaia ai foi se ‘au o le a lē taumate le SamoaTel atoa ai isi sui o le atunuu, o le a malosi atu ma o le a faaauau ona unai ana taumafaiga faavaomalo.
Faaalia e le Sui Pule o le SamoaTel i se taumafaiga e saga faalauiloa ai le lagolago a Samoa i le lakapi liki, e pei ona tufa ai ni mitiafu ia i latou na vili atu sikoa o le taaloga muamua ma tusi tusi atu i le Go Mobile ‘ai o le taaloga, e maoae lava lenei laasaga ua oo i ai le Lakapi Liki ma e lē o vaavaai foi le SamoaTel i ‘ai o ia taaloga, ae ua vaavaai i le malosi e ono oo i ai le ‘au a le atunuu pe a faaauau ona ave i ai le lagolagosua a le atunuu.
“E lē gata ina iai le faalauiloa tele ona o lea ua taaalo ma le siamupini o le lalolagi, ae ua faalauiloa atu ai ma le kamupani a si o tatou atunuu, ma o se taumafaiga e manatu le SamoaTel e talafeagai lelei ma le lagolago ua avatu i le Toa Samoa,” o se saunoaga lea a le alii Sui Pule o Lealali Faletoese Asaua.
