Ua tauia le tautiga i le lua tausaga sa koleni ma tapena ai le tamaitai o Ele ma lona tuagane o Niusila Opeloge, auā ua uma taaloga a le Pasefika i Saute sa taulima ai le $60 afe mai pine auro na manumalo ai, ae ua taulima nei e o la mātua ma le aiga le $100,000 mai la pine auro e lua o taaloga a Malo o le Taupulega e pei ona maua e le tagata toatasi le siakitupe e $50,000.
Na faaalia e se tasi o Minisita o le Kapeneta sa fesiligia sona finagalo i le taui ua ofo e le Malo mo tamafanau a le atunuu e ausia ni tulaga maualuluga e faaeaea ai le igoa o Samoa, e talu lava ona folafola e le Malo le tuuina atu o taui tupe, e lē o toe faatamala tapenaga a alo ma fanau aemaise lava o faiaoga o aoaoina taaloga eseese.
O taaloga a le Pasefika i Saute na iloga ona feololo le numera o tamafanau a le atunuu na faamanuiaina i taui tupe ta‘i $20,000 ina ua latou ausia le pine auro.
Palasi ifo i tamafanau i le taaloga lakapi, na maua foi a latou seleni mai le Malo ina ua siamupini le taitoafitu a le Manu Samoa i le taamilosaga a le IRB.
Ua faaalia ai e le Palemia i lana saunoaga i le faaafe mo le autaalo i Taaloga a Malo o le Taupulega, e faato‘ā magalo le sala a le aulakapi taitoafitu a le Manu Samoa pe a toe faatumauina lo latou siamupini i le taamilosaga o le tausaga fou.
O Faavae Faauliuli, Ele ma Niu Sila Opeloge o i latou o uluai tamafanau taaalo a le atunuu ua faamauina lo latou ausia muamua o se tulaga maualuga i taaloga a Malo o le Taupulega, o le manumalo i le pine auro.
O le susuga Tuaopepe Jerry Wallwork lo latou faiaoga ua matuā momoli i ai le faafetai ma le faamalo a le Palemia.
“Tasi lea faiaoga ou te vaai e lē malolo i le tapenaina o lana ausiisii, o le mea lea ua tatau i faiaoga o isi tou autaaalo ona tinou ma maua le agaga lea e i le afioga Tuaopepe”.
O loo manatua pea e le atunuu le vevesi na aliali mai ina ua tuanai taaloga a le Pasefika i Saute na talimalo ai Samoa ina ua feteenai nisi o sui o le faalapotopotoga siisii uamea mamafa, ma na oo lava ia vesiga i luma o le alii Palemia.
Na taumafai ai nisi e faatu lava le latou faalapotopotoga siisii uamea mamafa e mafua i nisi o mataupu faalotoifale.
O lea la ua silasila nei le atunuu i fua aliali o le tautiga o alo ma fanau sa aoaoina e le afioga Tuaopepe Jerry Wallwork, ua a‘e manuia le faatamasoaliiga.
