O se vaaiga ina matagofie ma mataina le tutufaatasi o susuga i faafeagaiga ma a latou ekalesia mai fata faitaulaga e fia e galulue faatasi i le agaga e tasi ina ia fesoasoani atu ma auauna atu. O le finagalo lea o Keriso e pei ona ia fetalai ‘Ou te lei sau ina ia auauna mai ae ia auauna atu.’
E sili atu i le 50 ekalesia Kerisiano i totonu o Aukilani ae lē aofia ai isi itu o Niu Sila, Samoa ma Ausetalia sa auai i le 7 Aso o le Servolution poo se polokalame fesoasoani ma auauna mo se tasi e fia moomia le fesoasoani.
Na mafuli le tele o galuega i lenei tausaga i le fesoasoani i aiga vaivai aemaise aiga ua leai se tamā ae na o le tina ma fanau, le faamatagofieina ma faaleleia o faleaoga, o fale o tagata nofo toatasi, faafiafiaga ma asiasiga mo tagata matutua, o le fafagaina o tagata fiaaai, tufa fuaina o ofu mo le fanauiti aemaise o le faamamāina o taulaga faatau.
I totonu lava o Aukilani na tele foi se sao o le matagaluega o leoleo ina ua ofo mai la latou fesoasoani i alii leoleo e galulue faatasi e oo lava i leoleo sa fai o latou aso malolo. Sa faapea foi ona ofoina mai taavale poo vans e feaveai ai le toatele o le tupulaga talavou i galuega eseese sa faatinoina ae lē gata i lea, o le fafagaina o i latou i taumafataga i le aoauli.
E tiga le tetele o timuga ma loulouā le tau o le vaiaso atoa, ae na lei foi ai le augalulue sa galulue i nofoaga eseese.
Na ta‘ua e le susuga ia Lui Ponifasio o le faafeagaiga o le ekalesia LifeChurch i Manurewa, o lē foi o loo taitai i lenei faamoemoe e faapea: “Afai ae lē aogā nei galuega i se tasi, ae ua ou mautinoa le telē o lona aogā i le tupulaga talavou sa auai ma galulue faatasi i le 7 aso. O nei talavou mai ekalesia ma gagana e fia ua mafuta, galulue, tatalo, aai, taliē faatasi ma auauna faatasi.”
“Ua latou vaaia ma lagona i o latou loto le tāua o le ola auauna i isi. O nisi o i latou na faateia ina ua vaai i le telē o le faaletonu o le mativa ma le lē tagolima o isi aiga.
O nisi na fesoasoani e teuina maota ma laoa o tagata ua leai ni faamoemoe, e ui i le manogi faaletonu se‘i tulou, ae na faia pea ma lo latou iloa o le fetalaiga e Iesu, “o le e faia se mea i le aupito itiiti ma le faatauvaa ua e faia lava lea ia te au.”
Saunoa foi se tasi o faafeagaiga o loo auai foi lana aulotu i lenei lava polokalame e pei ona amatamea mai ai i le latou foi faaitu i Magele o loo galulue ai, le Susuga Peter Leota, e telē le tāua ia te ia ma le ekalesia Peace Chapel o lenei polokalame o galuega fesoasoani a le Servolution, ona e fesootai lelei foi ma le visiona poo le tofa mamao a le latou ekalesia, ‘ina ia vaavaai e lē na o totonu o le lotoifale o le lotu ae ia vaavaai atu foi i fafo o le lotu’, auā o le agaga tonu lea o lenei polokalame, ia mafai e tagata lotu e lē na o le olioli ma talia le alofa o Iesu, ae ia latou momoli atu foi ma faasafua atu lenei lava alofa o Iesu i isi tagata.
Saunoa Leota, ua tusa nei ma le 3 tausaga talu ona sootaga mai foi latou ma isi ekalesia i lenei lava faamoemoe, e pei ona latou galulue faatasi mai ai i le latou foi faaitu, ma susuga i isi foi faafeagaiga e pei o le susuga Pastor Kuki Aloalii o le Samoan Livingstone Ministry Church i Magele, le susuga Pastor Poni Fonoti ma isi.
Mo le polokalame a le Servolution e pei ona faatoa mae‘a atu, sa lei mafai ona auai le ekalesia a le susuga Leota mo le vaiaso atoa, ona sa iai foi isi tuatuagia a le latou aulotu, ae sa latou auai mo na o aso e lua.
Sa matauina le sagisagi fiafia o le susuga i le faafeagaiga a o ia faamatala le telē o le aogā o lenei polokalame o le Servolution, auā fai mai a ia, ua mafai ai foi ona fafau a‘e ni faiā lelei ma ni a latou sootaga vavalalata ma le Pulega a le aai o Aukilani, le Auckland Council, o Local Boards, o alii ma tamaitai leoleo, faapea foi i aoga, e pei ona ta‘ua ai e Leota le aoga a Robertson School i Magele ma le Kolisi a Aorere.
Ma e lagolago e le saunoaga a Leota e pei foi ona ta‘ua e Pastor Lui Ponifasio, ua telē le aogā o lenei polokalame mo talavou, ua amata ona malosi le naunau fiafia e faatino galuega fesoasoani ina ia avea o ni suiga i olaga o isi.
O le taula‘iga lena a Ps Leota e pei ona ia faamamafa foi e ia i lana ekalesia, ia avea le Servolution e pei o se aganuu masani, se culture, o le a lē vaai i ai o se polokalame mo na o se taimi patino o le tausaga e faatino ai, e ui o lena le faatulagaga, peitai e mafai lava foi ona totō le agaga, ia fia auauna i soo se taimi e tulai mai ai se manaomia. Na vaaia foi i lenei tausaga le toatele o tupulaga talavou mai Ekalesia Tonga faapea ma Initia. E pitonuu ma sili ona mamafa i ai galuega o lenei tausaga o Otahuhu ma Glen Innes. Sa faapea foi ona avea le ‘au o le Servolution ma fesoasoani i le tapenaina ma le faamamāina o nofoaga sa faamanatu ai o tagata maliliu i taua poo le ANZAC i le vaiaso na tea nei. Na faaiuina lenei faamoemoe i se koneseti ma se taumafataga i le po o le Aso Tofi na tea nei sa faia i Glen Innes. Ua toatele nisi o ekalesia ua fuafua nei e auai i isi galuega Servolution ua faamoemoe mo le ‘afa lona lua o lenei tausaga.
