Le Malo o le Siva Afi – Matatia i le Faamasinoga a Samoa

“Ua tatau ona maua se lesona a le Malo i le mataupu a le Siva Afi, ma o le faamasinoga foi lenei o le a tāua mo le atunuu atoa i le lumanai”.
O se finagalo lea o le alii pule o le kamupani o le Siva Afi Design le susuga Leota Lene Leota ina ua faato‘ā talanoa faalauaitele i le tuanai o faamasinoga ma le Malo sa finauina ai ni faamanuiaga o taui poo compensation.
E tasi le miliona fitu selau ono sefulu iva afe, tolu selau tolu sefulu lua tala ma le iva sefulu sene ($1,769,332.90) le aofaiga atoa o le taui ua maua e Leota Lene ma lana kamupani e mafua i le taofia o le lisi a le Siva Afi e 20 tausaga sa latou faaaogā ai se eleele o le Malo i Sogi, lea sa iai le fale kalapu ma le faleaiga o le Laumei Faiaga ma lana pisinisi e lolomi ai lavalava.
O lagona ootia o le alii pule o le tapuaiga a ona aiga i Samoa ma atunuu i fafo, ona sa iai lava ni fautuaga ia te ia e faamagalo i le Malo ona ua umi pea taimi o faalogoina tala salalau i le finauga ma le Malo, peitai na saunoa Leota Lene, sa naunau pea e faia le finauga ona sa lē tuuaulafo le Malo e ala mai i le Minisita o Puanaoa Faalenatura ma le Siosiomaga le afioga Faumuina Tiatia Liuga, i le tuualalo na ave i ai.
“Pe ana iai se lagona alofa o le minisita semanu e mafai ona soalaupule lelei le mataupu ae peitai e lē o le tulaga lea na iai”, na saunoa ai le alii pule.
E $462,000 ma ona tupu na totogi muamua e le Malo i le kamupani ina ua mae‘a ona tagofia e le faamasinoga maualuga le finau atu a le Siva Afi, ae peitai e lei aofia ai ma se taui o tupe e lei toe maua e le kamupani poo loss of income, ina ua faamuta le lisi ma lē toe faagaioia taumafaiga masani a le kamupani, faaopoopo iai ma le totogi o tupe na siitia ese ai meatotino a le kamupani, le totogi o le faufuaina o le tau sa tatau ona maua le valuation cost, ma le totogi o galuega faaletulafono po’o
legal cost.
O le faatulagaga a le faamasinoga o talosaga apili le court of appeal i le taui e faapea:
Loss of benefit..$473,000, added value of improvements..$205,000, relocation cost..$40,186.15, business loss..$950,000, valuation cost…$30,000, legal costs on the taking..$71,146.83..Alofaiga faatasi o le taui tupe e $1,769,332.90sene.
O le eleele ua fausia ai nei le maota fou o le Malo ua faaigoaina o Tuiatua Tupua Tamasese Efi, sa lisi ai le Siva afi i se vaega o lea fanua o le Malo sa iai le nofoaga autu o le Esetete tausi i tausaga ua mavae.
O le fausia o lea maota na mafua ai ona faia le faaiuga a le Malo e faamuta le lisi ae faaaogā uma le fanua mo le galuega. Sa faaaogā ai e le Malo lona malosi faaletulafono i lalo o le tulafono o le aveina o eleele mo galuega e faanmuta ai le lisi a le kamupani ma aveesea ma le fanua.
Saunoa Lene, “pau le itu ua matou fiafia ai ua uma atu lenei mataupu sa avea o se avega mamafa i le tele o taimi, ae se‘i sagai atu loa e toe faatulaga lelei le ma pisinisi.”
Sa faaleo foi e le susuga Lene lona loto faafetai ma le talisapaia o le galuega fita sa feagai ma ana loia, lea sa matuā finauina malosi lenei mataupu ma a taunuu ai i se
iuga fiafia. O le tamaitai loia, Afioga Leuluaialii Olinda Woodroffe, ma lona alo tamaitai o le loia foi, Annette Woodroffe ma le ofisa uma a le Woodroffe Lawyers, sa galulue i lenei mataupu. Faafetai foi e Lene le fesoasoani malosi o lana faufautua, business adviser, susuga Eddie Wilson, ia faapea ai le toatele o isi uo ma paaga sa faamalosiau atu ma lagolagosua ua mafai ai ona maua pea le lototele e finauina ai lenei mataupu na semanū e faaselemutu lava ma lē iloga mai se taunuuga lelei, aemaise lava le agaga sa finau ina ia fai le amiotonu.