E tusa ai ma le taaloga i le faaiuga o le vaiaso na se‘i mavae atu nei, i le alii taalo malosi i le laina i luma a Hurricanes ia Ardie Savea, ua mae‘a se taotoga i lona aao e tusa ai ma ni manu‘aga ma iloa ai le talafeagai ona malolo mai i taaloga mo le isi 6 vaiaso.
Ma o le tausaga lenei sa i le tumutumuga i lenei alii taalo ia Ardie Savea lona naunau malosi ia siitia le tulaga a le Huricannes i le 2015. E talavou lenei alii ua na o le 21 tausaga.
E ui ina sa manumalo le Hurricanes i le la taaloga ma Highlanders i le 20-13 ae o le taaloga tonu lea na afaina ai le aao o lenei alii taalo i le afiafi o le Aso Faraile i le vaiaso talu ai. O le malolo ai o Ardie Savea mo le 6 vaiaso una faapopoleina ai nei le alii Faiaoga ia Clark Laidlaw.
Ua amata saili le alii Faiaoga i se tasi e talafeagai lelei i le avanoa lea mo le isi ono vaiaso, ma e foliga mai o le alii ia Callum Gabbins e ono filifilia i lea avanoa a o manu‘a ai le alii ia Ardie Savea.
O loo taulai foi le silasila a le alii faiaoga i le isi alii taaalo ia Adam Hill, faapea foi le isi alii taalo mai Manuwatu suafa ia Heiden Bedwell i le tulaga o le alii ia Ardie Savea.
O loo tumau pea le fiafia o le alii Faiaoga ia Savea, ae pau lava o tulaga e oo lava i ‘au uma i le maualuga o le tulaga o le Supa 15 e taufai lelei uma tapenaga a ‘au taitasi.
O le isi vaega o loo faasilisiliina ai e le alii Faiaoga ia Ardie Savea ona o lea ua amata selesele i fua o galuega ma taumafaiga mai tausaga ua mavae atu, ma vaaia ai le agaigai pea i luma le tomai ma le faatinoga o le taaloga i lona tulaga.
O le taaloga la i le vaiaso nei lea o le a fetaui ai loa ma le ‘au a le Melbourne Rebels i le Laumua i Ueligitone. O loo iai le talitonuga maualuga o le a siitia ai le tulaga lelei o loo ua iai le Huricanes aemaise ai lava le alii ia Victor Vito.
