“O loo fia maua ni tupe se tele mo tapenaga ae o se ata faataitai pe na o se $200,000 se tupe mamā e maua”…Ofisa Sili Iuni Lakapi
O le upu moni lava ia e taugata tele pepa ulufale mo le taaloga a le Manu Samoa ma le Olopeleki o le a faia i Samoa i le aso 8 o Iulai 2015. O le taugata o pepa ulufale ua faamaonia, ina ua faailoa e le iuni lakapi le tau o pepa lea a fua i ai, o le pepa taugofie e $40 tala ona tau soso atu lea i ai o le $100 tala.
Peitai o fale matamata lava ia e $500 le ogatotonu ae $300 fale matamata i autafa. O lona uiga o le toeaina ua aulia le 65 tausaga o le soifua o loo malosi lana savali ma le pupula e fia auai e maimoaina le taaloga lenei, o le a faigata ona maua sona avanoa.
O le mafuaaga muamua ona a tuai e faatau sana pepa e le maua sona nofoa, e mafua lea itu ona o le a muamua taufao pepa $40 tala, sosoo atu ai ma le $100 tala. Peitai e ui i se faatusatusaga o lea tulaga i se vaai faalemafaufau ae o le finagalo o le Pule Sili faavaitaimi o le Iuni lakapi a Samoa, ua leai lava se ‘alofaga i le faailoa atu pea i le atunuu e taugata le aumaiga o le Olopeleki i Samoa auā e totogi uma e le iuni pasese ma nofoaga e faamautu ai aemaise o isi vaega manaomia o le iai o le aulakapi numera tasi i le lalolagi i eleele o le Manu Samoa. Ua aumai ai foi ma se ata faataitai o se selei mamā e ono maua e le iuni lakapi a le atunuu pe na o se $200 afe tala Samoa.
O le kamupani telefoni o le Bluesky Samoa ua ave i ai le faatagaga e le iuni na te faatauina ai pepa e aofia ai le aoina o seleni mai pepa e taulia. E leai lava se isi kamupani e faatauina pepa, ua na o le Bluesky ma o se tulaga lea e ao ona malamalama i ai le atunuu, ona e lē talia se pepa ulufale e faatau mai i se tagata poo se isi lava auala.
O pepa ulufale foi e pei onaa faaalia e le pule sili faavaitaimi le susuga Faleomavaega Vincent Fepuleai, e lē mafai ona toe lolomi pe kopi ona o ni pepa ua gaosia i ni faiga faaonaponei e lē mafai ai se auala faatogafiti.
E na o le 12,000 tagata ua mautinoa e mafai ona ofi i le malae autu o le Apia park stadium mo le maimoaina o le taaloga. O lona uiga e toatele le atunuu o le a lē mafai ona maua ni avanoa.
E lei faailoaina mai e le pule asili faavaitaimi pe fia le aofai tonu o pepa ulufale o le a faatau, ae o atugaluga pe a te’i ua oo ise luasefulu afe pepa e faatau, e iai tagata o le a le maua ni nofoa.
Le mafuaaga lea ua toe fausia ai nisi nofoaga faaopoopo mo tagata matamata i nisi o vaega faatamilo i le malae e faaaoga ai tulaga poo scaffle. O fale matamata ile itu i sasa’e o le malae o le a iai corporate boxes poo pusa e mafai ona maimoa mai ai tagata e toa 20 ile pusa e tasi. Peitai e le tele ni pusa ae o le tau foi e $15,000 mo le pusa e tasi ma e nao pisinisi ma paaga totino a le iuni lakapi e mafai ona latou faatauina.
O le fausia o le malae taalo ma fale matamata ua faaalia e Faleomavaega ua oo atu le logo a le pulega o malae taalo e tatau ona mae‘a i le faaiuga o le masina o Me ona tuu aloaia atu lea i le iuni lakapi a Samoa.
O loo mautinoa foi e le iuni o le a fetaui lelei tapenaga uma ma le aso o le taaloga. Mo i latou o le a gafatia le tau o pepa ma lē maua se avanoa, o le a iai ni screen tetele o le a faatutu i le maketi i Salelologa ma lumafale o le maota o le Malo i le eleele fou e maimoa ai.
