Ole 73 tausaga ole soifua ole susuga ile faafeagaia ia Rev Elder Leiite Setefano ua malolo manumalo mai ai i lana galuega faafaifeau e pei ona ia tautua ai ile galuega ale Atua ile Ekalesia PIC i Tamaki.
Ae o lana tautua faafaifeau o lea ua savali nei ile 46 tausaga talu ona avea ma leoleo mamoe i nisi o ekalesia, e pei ona muai galue ai ile ekalesia PIC i Rotorua ile tausaga 1971 – 1975, ole ekaleisa i Pitone ile 1975 – 1980 ma le ekalesia PIC Tamaki ile 1980 – 2016 e pei ona malolo manumalo ai nei, ma o lea ua silia ile 36 tausaga ma masina e fitu talu ona galue Rev Elder Leiite Setefano ma Lealofi Setefano ile tausiaina ole tovine i Tamaki.
Luitau ole Galuega
Ile tausaga 1980 ina ua amata ona galulue i laua ile ekalesia PIC Tamaki, ole taimi tonu foi lea faatoa faavaeina ai le ekalesia PIC Samoa ma le ekalesia Niue i totonu o Tamaki, auā e taunuu atu i laua e na ole lotu ile itu palagi ma lotu PIC Rarotonga.
Sa taumafai i lea taimi e fai se galuega e ono maua ai le galulue soosoo tau‘au faatasi o tagata papalagi ma o tatou tagata ae faapea foi ia Niue ma Rarotonga, e ala lea ile aoaoina o tatou tu ma le aganuu ina ia mafai ona masani ai auā e iai lava le eseesega.
Ile taimi la lenei e lē o toe iai se aulotu a tagata papalagi ae toe lava na‘o Samoa, Niue ma Rarotonga, oloo mafai ona laua tauaveina i Aso Sa taitasi, e amata ile lotu tuufaatasi ile gagana Peretania ona sosoo ai lea ma le lotu Rarotonga, sosoo atu ai ma Samoa ae faauma e Niue. E tasi foi le fono e tauaofia uma ai nei aulotu e tolu i Tamaki ae tasi lava le faifeau o Rev Elder Leiite Setefano ma le faletua ia Lealofi Setefano.
Ile feiloaiga ma le susuga ile faafeagaiga, na ia ta‘ua ai sona lagona faigata ma le lē faigofie ole motusia ole mafutaga ma le aulotu ona ua loa tausaga o mafana le mafutaga osia, ae peitai ane, ua leva foi ona laua sauni iai ma tapena iai ile fia maua lea ose malologa mai le galuega faafaifeau.
Ile talitonuga ole auauna ale Atua, ole galuega lava ia ale Atua e tumau e oo ile faavavau le ekalesia, ae ole aufaigaluega e gasolo mai ma toe foi atu, ma e lē tumau foi so latou malosi.
Ole lagona foi lea ia i laua e lē toe tutusa le malosi e pei ona amata mai ai le galuega, ua tatau foi ona faaseetuagalu ae agai mai le aufaigaluega talavou e tauaveina ma faaauauina ma faalautele le laau ua uma ona totō. Ae lē gata i lea ua fiafia ai foi o laua loto ua alagatatau loa ona malolo manū o maua lo laua malosi e asiasi ai e mafuta i fanau faapea fanau o a la fanau.
Faamavaega ma Aulotu
Ole Aso Tofi, aso 3 o Novema na tatala ai le osiga feagaiga ale aulotu Niue ma le susuga ile faafeagaiga ma lona faletua ua mae‘a ai foi le laua galuega ile aulotu Niue, ae ole Aso Sa na sosoo ai, aso 6 o Novema na feiloai ai ma Rarotonga ma faatino ai foi tu ma le aganuu a Rarotonga e faamavae ai ma lea foi aulotu.
Ae ole taeao ole Aso Toonai ua mavae, aso 10 o Tesema na tatala ai le feagaiga ale aulotu Samoa ma o latou mātua faaleagaga nei, na faatino foi tulaga masani ole aganuu a Samoa e pei ona masani ai aso faapenei, na tatala le malo i tulaga o faaaloaloga, aemaise ai o meaalofa tupe na saunia ele ekalesia auā lava le faatinoina ole alofa moni ma le misia ole mafutaga i totonu ole ekalesia.
E lei faigofie ona tatala le mafutaga auā ua misia lenei taitai iloga ma le faamaoni ile faafaileleina o agaga o tagata i totonu ole ekalesia. O loimata ole alofa ma le loto ua nutimomoia i tagata uma ole aulotu sa iai ae faapea foi i aiga na lua ole susuga ile faafeagaiga ma le faletua, na molimauina le tatalaina ole mafutaga ma le faifeau ona ua malolo manumalo.
Ole tofa ia Talamalie Ropati Seuala ole aao tusitusi ole ekalesia sa nafa ma le faatautaia ole aso i ona vaega eseese, ae faapea foi le faaleoina ose agaga faafetai ale ekalesia Samoa ile tamā faifeau ma le faletua ona ole mafutaga na osia ile tele o tausaga.
Ta‘ua ele failautusi, e ui ile faigata ole tatalaina ole mafutaga ae lē tuua ai ala o mea e pei ona iai le aufaigaluega totofi ale Atua. Ua tatala ma le loto ua malie ma le loto fiafia lenei mafutaga ona ua tele ni galuega lelei sa finauina ma taumafai ai mātua faaleagaga e faatino a‘o tauasa mai ai le sa ile tele o tausaga.
E pei ole Malumalu Tapuai, Hall ale Ekalesia, Maota ole Faafeagaiga, Aoga Amata ua faaigoaina ole Teuila lea sa faavaeina ele faletua ia Lealofi, o nei meatotino uma, ua mae‘a ona totogi uma e aunoa ma se aitalafu. Ma ole pine faamau lea ole mafutaga lelei ma le feagaiga mafana ae ua faailoa ai foi se tautai mataala ma se tautai poto a‘o avea ma faifeau i totonu ole ekalesia.
Ole Aso Sa, aso 11 o Tesema na lauga faamavae ai loa Rev Elder Leiite Setefano ile aulotu Samoa ma tuu aloaia ai loa auā se isi tofi fou mo le ekalesia, e tuua le aulotu ua 52 matafale galulue oloo ua iai, ae ole Aso Sa oloo lumanai nei, ole a lauga faamavae atu ai ile tuufaatasiga o aulotu e tolu e pei ona iai i totonu ole PIC i Tamaki ma faamae‘a ai loa le laua galuega faafaifeau.
Ua misia ele fanau talavou o latou mātua faaleagaga auā e lē misi lava se Aso Sa ma pepese ile taimi ole sauniga, auā ole tasi lea itutino tāua ole galuega ale Atua ile itu Samoa sa faavaeina foi ele tamā ma le tina faaleagaga.
