Ole saunoaga amata ale susuga ile faafeagaiga ia Motu Matia na ia tatalaina ai le po fiafia ale Walking Samoans e ala ile latou tufatufaga faailoga ile Maota Samoa i Magele ile po ole Aso Toonai na tea nei, na ia faapea ai, “Ole Atua ole tumutumuga lea o mea uma, o ia foi e taimua ai mea uma”.
I totonu o lea saunoaga na ia toe faamanatu ai ile mamalu ole mafutaga i lea po, le saunoaga ale Ao ole Malo o Samoa le Tui Atua Tupua Tamasese Efi e faapea, “O Samoa a oo ina potopoto ise mea e fai, e ta‘ua ole aiga e tasi”, ma e fafagu pea ma faamanatu i lea saunoaga tāua ile loto, ona o Samoa e potopoto ile alofa, potopoto ile fealofani, ma le galulue faatasi.
Ole taualuga o lana tulai, na ia to mai ai se ‘au‘au ole po ise upu faaleagaga e taiala ai le Savaliga ale Walking Samoans e ala ile faamalosi ale Aposetolo i lona atalii faaleagaga o Timoteo, “Timoteo e lei foaiina mai le Atua ia tei tatou le Agaga tatou te matatau ai, ao le Agaga tatou te faamalolosi ai ma alolofa ai ma mafaufau tonu ai”.
O ni upu tomua na fusia ai loto o tagata uma ile fiafia mai ausavavali e fitu ole Walking Samoans ae sa avea foi ma taiala ma avefeau momoli mo le isi foi savaliga ile tausaga fou.
Ose tofa na a‘e ile tofa Teleiai Edwin Puni ma Sooalo Setu Mua, e fai se po fiafia e faatasi uma ai le ausavavali o ē sa toaaga ma faamalolosi i savaliga ale Walking Samoans i vaiaso taitasi, e pei ona potopoto ai le toatele ole atunuu e silia ma le 300 i lea po.
Sa tauaao tusipasi, ma pine auro faapitoa mo le amanaia o ē oloo faatāuaina le savali mo le faamalositino. Ole faamoemoe ma tapenaga o lea po, sa pulupululima faatasi ai le faiga paaga a auaunaga a kamupani eseese, le Samoa Multimedia Group Ltd, Event Polynesia, Health Star Pacific, ma nisi o sponsors e pei ole susuga Lautofa ma le House of Decor, Digicel, Aotea Finance, Talimanao Catering, G-Mana Band, Maota Samoa, Alliance Health ma le komiti o taitai o ‘au savavali.
Ole afioga Peseta Savea Al Harrington Lavea sa fai ma fofoga ole po sa faafeiloaia le mamalu ole atunuu.
Ole lauga autu na saunoa iai le faletua ia Ane Ponifasio le pule ole Samoa Multimedia oloo faatautaia le Radio Samoa ma le Samoa Times, na ia toe fofola ai le mafuaaga ole amataina ole faamoemoe ma le tāua na mafua ai ona a‘e se tofa ile pulega e faavae le Walking Samoans.
Ole masina o Me ile tausaga 2012, na feiloai ai Ane Ponifasio ma nisi ole matagaluega ale Heart Foundation NZ i lona lala ole Pacific Heartbeat ma le Tala Pasifika le alii Tonga o Sefita Haouli, na talanoaina ai le amataina ole Walking Samoans, e pei ona silafia, ole auaunaga a lea faalapotopotoga ole taumafai e taofi tagata ile maliliu ile ma‘i fatu, atoa ai ma le faailoa i tagata lautele auala ole ola soifua maloloina lelei.
Ole masina o Novema ile tausaga 2012 na amata faalauiloa aloaia ai le polokalame ma faasalalau aloaia ai ma le savali ale Radio Samoa ua faaigoaina ole Walking Samoans e lē gata i luga ole leitio ae faapea ma le nusipepa ole Samoa Times.
Ua atoa ai nei le fā tausaga talu ona faatino lenei faamoemoe seia oo mai lava ile taimi nei.
Na taualuga le saunoaga ale faletua ile tauaaoina atu o ni faailoga faapitoa mo i latou sa taulamua i lenei polokalame aemaise ai o kamupani sa lagolago malosi ile faamoemoe i vaiaso taitasi e pei ole G-Mana Wholesale Autos ma le Sanctuary Memorials.
Ose faafetai faapitoa na faasili ile tofa Teleiai Edwin Puni ma Sooalo Setu Mua, auā o laua na taulamua ile amataina ma faamaopoopoina ole toatele ole kalapu ausavali, ua silia nei ma le 200 tagata oloo auai i vaiaso taitasi.
Ole aso 6 o Ianuari 2016 na faavaeina ai le Walking Samoans ile pitonuu o Tamaki ele tofa Teleiai, ose faiga paaga faatasi ma le Heath Star Pacific. Peitai, ua tupu ma ola le fatu sa faafaileleina ma totoina, lea ua savali nei ile 7 ausavavali ale Walking Samoans i totonu o Aukilani e pei ona iai Manukau, Manurewa, Clendon, Otara, Tamaki, Magele, ma le itu i Sisifo. I totonu o ia ausavavali oloo taulamua ai nisi o susuga i faafeagaiga, o tuaa sinasina seia oo lava i fanauiti.
Mo le tausaga 2017 oloo iai le faamoemoe e amata ai nisi aukalapu fou ale Walking Samoans i soo se pitonuu o Niu Sila, faapea ma Ausetalia ma fafo atu. Ma oloo maua i luga ole Samoa Times le faasalalauina pea i vaiaso taitasi o ausavavali ma le facebook ale Walking Samoans.
E maeu le agalelei ole Atua ile matagofie ole feiloaiga a ausavavali i lea po, auā o lea ua maua le avanoa, e talatalanoa ai ma aai faatasi ma sisiva, e ese mai ai i savaliga e pei ona faia i vaiaso, se mea ina a lelei ma le matagofie o uso ae nonofo faatasi.
Ae lē gata i lea o faatalatalanoaga mālie na faia ma nisi o tamā matutua ole atunuu e uiga ile tāua ole savali ile olaga ole tagata lea sa faatautaia ele susuga ia Tavai Meni, sa maua ai foi ma le ‘ata auā ole isi vailaau sili lea ile soifua ole tagata.
Taualuga le faamoemoe ile tufatufaina o Tusipasi ma pine auro mo i latou sa galulue ma le faamaoni ile savali i lenei tausaga.
Pitonuu ole Walking Samoans & Suafa
TAMAKI
Faalogo Edwin Peterson
Tavita Lila
Sialaoa Sefo
Senio Faasau
Patosina Winterstein
Vazzz Patel
MAGELE
Faletolu Pule
Faamatuaina Tufue
Fuaolemoli Petelu
Seumanutafa Leung – Yid
Tuiloma Muliaga
Lutia Neemia
Fonoimoana Maleko
Situpu Olo
Faaolataga Faasavalu
Alofa Mauava
OTARA
Mulipola Palaaia
Loau Setefano
Magele Sam Magele
Sa‘ese‘ese Uisā
Moetafaitia Tagaloasa
Leone Leo
Pastor Toetagata Sofeni
Koreti Etuale
Telesia Vaafusuaga
Pastor Moe Nikolao
AUKILANI SISIFO
Mausii Mausii
Shanghai Engle
Pepe Maalo
Amela Tuiuli
Magele Vauimasenuu Misa Taotafa
Lealali Lealali
Timua Sio
Marieta Lemalu
Vaovasa Paila
Unasa Petelo Vaa
MANUREWA
Aumua Ave Soli
Fetaimalii Loau
Paulina Kaisala
Potofou Taulia
Manusamoa Halo Alaimoana
James Whakaara
MANUKAU
Ken Felagai
Max Ng Lam
FAAILOGA FAAPITOA
Pastor Motu Matia
Pastor Suluape Lo Tam
Tom Malo
Galumalemana Fetaiaaimauso Galumalemana
Faletua Ane Ponifasio
