O le aso 28 Tesema 2013 na faatau atu ai i tua le Vaega 1 o le ata tifaga o le Matai. Mai lea taimi e oo mai i le asō, e lē o malolo le tuufesili o tagata poo afea o le a maua ai le Vaega 2 o le Matai. O se tala fiafia lenei i le mamalu o le atunuu, auā o le Aso Toonai o le vaiaso nei, 19 o Mati ua faamoemoe o le a amata faatauina atu ai i tua le Matai Part 2.
Na ta‘ua e le afioga ia Lemalu Fiu Fogalevai Aukuso, o loo ia tusia le tala ma faatonutonuina foi le pueina ai o lenei ata tifaga. O le Vaega 2, o loo taulai lea i le 6 vaiaso muamua o le nofoaiga a Lui i le suafa Safuiane, ae faatoa fā lena o vaiaso talu ona maliu lona tamā o Toomau.
E pei ona maimoina i le Vaega 1, le feteenai o le lotoifale o le aiga potopoto ina ua pale Lui i le suafa Safuiane. Ina ua mae‘a ona laolao i fale ia faaletonu sa manatu Safuiane Lui o le mutaaga lea o ni tetee faasaga i lona matai.
Ae pagā lea, e lē o le tulaga lea na iai, e sili atu le matuia o faafitauli na alia‘e mulimuli mai faasaga i le avea o Lui ma Sa‘o o le aiga. E lē gata i lea ae o lona ia lava lotoifale i suiga na aliali mai i le va o ia ma ona tuafāfine ma lona tina talu ona maliu si ona tamā o Toomau.
Na ta‘ua foi e le afioga ia Lemalu, o se tasi o vaega tele o le Matai 2, o le taulai lea i le uo teine a Safuiane Lui, le tamaitai o lalelei o Oketi o loo faatinoina e Alofa Tagaloa, lea na ia faamuta le la faigauo ma Lui ona o le faatonuga a lona tamā faifeau o Ielemia o loo faatinoina e Tagaloa Fiafia Manase.
Na aotele mai e le afioga ia Lemalu e faapea, o le Matai 2 o se ata o loo molimoli mai ai le soifuaga ma uiga moni o tagata Samoa, o loo aumau i atunuu i fafo, o faafitauli faalotoifale i totonu o aiga, o vaaiga i totonu o aiga potopoto ma ekalesia, ae o le feteenai o talitonuga faa-Samoa o mātua, faatusa i manao ma lagona o fanau na soifua ma ola a‘e i Niu Sila, Ausetalia ma atunuu e malosi ai tu ma aga faapapalagi.
E tusia lenei lipoti o loo tapena le South Seas Pictures i se faafiafiaga e faia lea i le Flea Market i Otara i le Aso Toonai nei ma amata faatau atu ai i tua le ata tifaga fou. O nisi faamatalaga e uiga i lea faamoemoe o le a faasalalauina atu lea i le Radio Samoa.
Ina ua fesiligia le afioga ia Lemalu pe o le ā sona silafia i le Matai 2 e faatusa i isi ata tifaga fou e pei ona faatauina nei i tua? Na saunoa Lemalu, ua silafia lava e le atunuu le tautua a le South Seas Pictures na mua i malae i le pueina o ata tifaga Samoa, ua iai foi le talitonuga o le atunuu, i le tapena lelei ma le mananaia o ata e pueina e le South Seas Pictures.
Na ia faaalia foi lona agaga fiafia i le tele o ata tifaga Samoa fou ua pueina e nisi foi kamupani pue ata, o se faailoga o le ola ma le agai i luma o lenei foi atinae i totonu o Samoa. O le Matai 2 e tusa ma le lua itula lona umi, e silia ma le 50 tagata o loo faatinoina lenei ata tifaga, na pueina i nofoaga eseese i totonu o Magele, Te Atatu Peninsula, Avondale, Manurewa ma Otahuhu.
Na ta‘ua e Lemalu e tolu nofoaga autu o le a faatauina ai le Matai 2 i le Aso Toonai 19 Aperila, o le Flea Maketi i Otara, o le Flea Maketi i Mangere, ma le Samoa Video Center i Otahunu, ae o le a mafai ona maua i isi faleoloa uma e masani ona faatauina ai ata a le South Seas Pictures i le Aso Gafua, 21 Aperila 2014.
