E ui i le teena e le Sui palemia ma le Minisita lagolago o le Matagaluega o Fefaatauaiga, Alamanuia ma Leipa o o la moliaga o le faalavelave i tiute o leoleo, lē usitaia aiaiga o le tulafono i le faaaogāina o le masini mānava poo le breathalyzer, ae ua taunuu le faamasinoga i lana faaiuga ina ua mae‘a ona iloilo molimau, ua faamaonia moliaga a leoleo.
O le taunuuga lea o lenei mataupu e pei ona sa fofogaina i le Aso Gafua o lenei vaiaso aso 14 o Aperila 2014.
E lē toe tau faailoaina moliaga o nei taitai o le Malo ona ua tele lipoti ua faasalalau faasino i le mafuaaga na taofia ai e leoleo le taavale a le Minisita lagolago le afioga Muagututagata Peter Ah Him, i se tiute o leoleo na faatino i le masina o Oketopa o le tausaga ua mavae 2013. I le suesueina o molimau a leoleo e lagolago ai moliaga na faaalia e le faamasinoga ina ua mae‘a, ua lava mau e faamaonia ai solitulafono.
O le mafuaaga lea na tulai ai le Sui palemia ma faia lana molimau tuu fofoga e teena ai mau na folasia e leoleo e to‘asefulutolu na tutulai e faia a latou molimau tuu fofoga. O le taunuuga o moliaga o nei taitai poo ni tamalii foi o le atunuu o loo umia tofi minisita o le Malo ma tofi faipule o o la itumalo, ua faatulaga mai ai e le faamasinoga o le a aumai sana iuga i se faasalaga i le Aso Faraile o le vaiaso a sau, le aso 25 o Aperila 2014.
Ina ua mae‘a ona lau le faaiuga na feiloai atu le Sui palemia i nisi o matai o lona itumalo sa tapuaia le mataupu. Na saunoa ai le Sui palemia ma ia faailoa lona faafetaia o le latou lagolago e pei ona faaleo atu ai foi le tumau pea o le latou lagolago i le avea pea o ia ma tofi faipule o Anoamaa i Sisifo.
O le saunoaga a le Sui palemia na ia ta‘ua ai foi lona faafetaia o le faamasinoga ona o lona talitonuga o le iuga ua aumai o le faaiuga amiotonu mai le Atua. O le tofa Autu Lolesio se matai o Luatuanuu na avea ma fofoga o le tapuaiga e momoli le faamalo i le Sui palemia i le onosai, ae o le lagolago a le itumalo ia te ia e le aveesea. O lona finagalo e lē toe iai se isi tofi o le itumalo ma o lea foi ua iai se manatu e lē faia se palota a Anoamaa i Sisifo.
O le a tālia nei se faaiuga i se togisala a le faamasinoga faasaga i le Sui palemia ma lana minisita lagolago. O le faasalaga o nei moliaga ua faamaonia o se sala tupe poo se faasalaga faafalepuipui, ae e iai le talitonuga e ono talosaga loia mo le Sui palemia ma le minisita lagolago mo se faaiuga e soloia ai le faamaonia o moliaga e aunoa ma se faasalaga.
