“Pasi le Fua”, o le manulauti poo le autu lea o loo taumafai le aiga o Tusani Le Faiaao o Savaia Lefaga e faatino i tausaga uma, o le faasolo o le lotu faamanatu i totonu o le aiga e faamasani ai alo ma fanau aemaise o augatupulaga o loo fai a‘e, ia latou malamalama i le talafaasolopito ma le tupuaga o le aiga. O le naunautaiga lea a mātua o loo latou taitaia lenei faamoemoe ia tutupu a‘e a latou fanau ua mafai ona latou taitaia ma fuafua ni polokalame i totonu o le aiga.
O le Aso Toonai, 19 o Iulai na toe faataunuuina ai lenei mafutaga tuufaatasi a le aiga Tusani Le Faiaao i le Community Hall i Manukau. Na faatasi uma mai i ai tamā ma tina matutua o le aiga faapea a latou fanau. Sa malaga mai foi nisi o le aiga i Samoa faapea ma Ueligitone. O lenei mafutaga ua silia nei i le selau tausaga talu ona fai. O Samoa na amata faavae mai ai, a o lea ua mafai foi ona faataunuuina i Niu Sila nei ona ua toatele tamafanau o Tusani Le Faiaao ua alala ma aumau i lenei atunuu.
O le polokalame atoa o le Aso Toonai na taitai lava e fanau poo auga tupulaga laiti, e pei ona avea ai le alii o Tala Tuala ma fofoga o le aso, a o le susuga ia Kopano Simani na saunia le faamalosi mo le aiga atoa e ala i le upu a le Atua. O le manatu na faaautu i ai lagona o le failauga ia pasi le fua, i lea augatupulaga i lea augatupulaga.
O le afioga ia Tusani Toma o ia lea sa faafeiloaia le paia o le aiga potopoto, ona sosoo ai lea ma le sauniga lotu. A o le afioga ia Tusani Elia sa fofogaina le tala otooto o le aiga mai lava i lona amataga seia oo mai i le taimi nei. O le tamaitai ai Lole ma JL na molimau i le mafutaga e uiga i lenei sauniga e pei ona faataunuuina i tausaga uma. Na faatinoina ai foi taaloga, o le toso o le ie i le ogatotonu ae vaelua ai fanau, o le uiga o lenei taaloga, o le faamasani o le isi i le isi. O le laulauina o mea sa tutupu i totonu o aiga e pei o faaipoipoga, o alo ma fanau ua iu mai Iunivesiete, o fanau ua o faamisiona ma le aoga Tusi Paia.
O le lotu faamanatu lenei na faamanuia ai foi ma le atoaga o le 70 tausaga o le soifua o le susuga i le faafeagaiga ia Rev Tala. O le tupuaga o lenei aiga e tupuga mai i ni tuaa sa galulue i le galuega a le Atua (faifeau) i tausaga ua mavae, ma o le isi manaoga foi lea o loo nofo tatalo ai pea, o le iai o ni lupe faalele o le aiga Tusani Le Faiaao latou te faaauauina le galuega a mātua.
