O le anavatau lea a nai o tatou tagata ma tamafanau o Samoa o loo alala ma papaaao i Aotearoa nei, o le saili malo.
O soo se faamoemoe lava foi e fuafua ma faavae, e lē faigofie lava sona amataga, a o le ola finau, ola tauivi ma le loto atoa e faalagolago ma faatuatua i le Atua e talia ai o tatou manao, o le auga lea ma le ala lea o faamanuiaga mo ona tagata.
E faapena foi la le tauiviga ma le taumafaiga na tauasa mai e le susuga ia Tony Ligaliga ma lona faletua ia Lynne Wright Ligaliga i le faatuina o si a la pisinisi lea na tatalaina aloaia i le Aso Toonai.
O le ola soifua maloloina o le tagata o le isi lea vaega e sili ona tatau ona faatāuaina, ma o se moemitiga lea i le susuga ia Tony ma le faletua lea ua tau lau o le faamoemoe viia le Atua. Na maofa ma faateia foi le faalogo aemaise o le vaai ma le maitau ina ua saunoa le faletua ia Lynne e tusa ma polokalame faataatitia ua faaaogāina e tagata ua latou faaaogā le fale faamalositino (gym), ona o le matagofie o foliga ma tino o alii ma tamaitai e pei ona sa faalauiloaina i lea aso.
O le auaunaga la ua ofoina mo tagata uma ina ia mafai ona tausia lelei ai le tino mai le soona lapoa, ia iloa ona faaaogā fuafuaga faataatia e mafai ona ausia (planner) aemaise lava ina ia mafai ona faaauauina pea le avea o se tagata malosi ma soifua maloloina lelei i le olaga. O le fale faamalositino e i totonu o le taulaga faatau i Onehunga, ma o loo maua ai ni avanoa se tele mo soo se tasi lava o fia maua se gym e agai i ai aemaise foi, o nai o tatou tagata Samoa lava o loo pulea foi lenei auaunaga taua, e mafai ai ona faafaigofie fesootaiga mo soo se vaega e manaomia auā le faaauauina o le tausiga o le soifua maloloina lelei ma mautinoa ai foi le faaumiumi pea o le soifua.
Ia faamalo le tauatai, malo le saili malo auā o lea foi ua ausia e alo ma fanau o si o tatou atunuu lea foi matatia aogā ma lelei tele mo nai o tatou tagata.
