O le masina o Iulai i tausaga taitasi ua avea lea ma masina o le tuufaatasiga o le aiga o Efaraimo i Niu Sila nei e fai ai latou mafutaga ma fai ai ma le lotu faafetai i le Atua ona o ana faamanuiaga i totonu o le aiga.
O le Aso Toonai, 12 o Iulai na toe aofaga potopoto ai foi le aiga atoa i le malumalu o le Ekalesia Perepereane i Glen Innes e sii le taulaga faafetai i le Atua e pei ona masani ai tausaga taitasi. O le faletama a le tamā ia Tootoo, o ia o le ulumatua o le fanauga e toafā a le tamā ia Efaraimo Tofilau ma le faletua ia Vaitoelau Manuaifua o loo latou faatinoina lenei lotu faaleaiga.
O le taitai o le sauniga o le susuga i le faafeagaiga ia Rolani Mikaele mai le Ekalesia Faapotopotoga Iesu Samoa i Niu Sila.
O viiga o le Atua na lagiina lava e tamafanau o le aiga Sa Efaraimo. Na sosoo ma le fofogaina o le tala otooto o le aiga e le afioga ia Manuaifua Penati, ma o le uii foi lea o le fanau ma faaiu ai ma le sauniga.
O le tausaga e 2008 na amata ai lenei mafutaga ma ua savalia nei i le 7 tausaga o lenei tuufaatasiga tāua.
O le afioga ia Tuatagaloa Efaraimo o loo avea nei ma peresetene o le mafutaga. E to‘a sefululima alo o le tamā ia Tootoo, e 10 tama ae 5 teine, ua fai i lagi le folauga a le toa 11 ae totoe mai ai le 4. E toatasi le teine o loo aumau i Ausetalia, toatasi le tama o loo nofo i Samoa, ma le toalua o loo aumau i Niu Sila nei.
