Ua masani le faalogo, ‘o le tele o lima e māmā ai se avega’. Leitioa foi a saafi le Faisalamo, ‘se mea ina a lelei o uso ae nonofo faatasi,’ auā e ui lava ina motu mai ma le taula ma aumau i atunuu e mamao, peitai o le aga lava lea e masani ai Samoa, o le faamaopoopo lava ma le faifai mea faatasi.
O le Aso Toonai i le faaiuga o le vaiaso na tea nei, na faatinoina ai le po siva o le mafutaga o le afioaga a Leauvaa i Niu Sila nei. O le faamoemoe o alo ma tamafanau a le afioaga e saili seleni auā tapenaga o le faamanatuina o le limasefulu tausaga talu ona faavae le mafutaga a Leauvaa i totonu o Niu Sila nei. O se mafutaga umi ma le maopoopo pe a fua atu i le tele o nei tausaga ua aulia e lē masino e lē ‘asa ma se faafitauli na fetaia‘i, ae ona o le alofa o le Atua ua taitai manū mai ai le folauga a le mafutaga.
Na tatala aloaia le mafutaga i le Aso Toonai i se sauniga faapitoa o le misasa i Grey Lynn a o lei taualuga i faafiafiaga ma taumafataga i le posiva na faataunuuina i le Malaeola Hall i Mangere.
O se faatasiga ese le matagofie na molimauina, aemaise o le vaaiga i le taulamua o tuaa sinasina ma nai tina o le afioaga i le faamaopoopoina o le faamoemoe. O se fiafiaga sili foi ua toe feiloai ai ma aiga, uo ma ē masani, ua leva ona tuua le nuu i Samoa, ae malaga mai i Niu Sila, lea ua toe potopoto ma mafuta i le posiva na se‘i mavae nei, ua o se aiga e tasi.
Tele meaalofa na foai ma faafiafiaga na faatinoina, o siva a aiga taitasi o le afioaga, ua fai lava le mea sili e manatu le tagata e fia fai mea lelei ai mo lona nuu. Ua moni ai le upu, e susue lava le faamalama ma toe tepa i le nuu na ola ma fanau ai, ua o se faamanuiaga.
Silia ma le $48,000 le seleni na faamaopoopoina ma le faamoemoe o le a fesoasoani tele lea mo tapenaga o le faamanatuina o le iupeli auro o le mafutaga i se aso o le faaiuga o le tausaga nei. E lei manino mai se aso ua tuupoina mo le faamoemoe o le afioaga, peitai o lea ua amata tapenaga ma sauniuniga mo le aso fanau tele o le afioaga o Leauvaa talu ona faavaeina le latou mafutaga i Aotearoa nei.
