E lei mafaufauina e le toaiva o taulelea ma se matai o Luatuanuu na molia ona o le polokaina o le alatele ia Mati o le tausaga nei, o le a oo se faasalaga a le faamasinoga mo nisi oi latou i le falepuipui. E lei solomuli le faamasino le afioga Fepuleai Ameperosa Roma, i lona faailoa ia i latou o le solitulafono o le faatupu ma auai i se vevesi e ogaoga ma matuia lona faasalaga.
O le Aso Faraile ua mavae na lau ai le faaiuga a le faamasinoga faaitumalo i solitulafono o le faatupu ma auai i se vevesi, sa molia ai taulelea e toaiva o Luatunuu, lea ua nofosala uma i le falepuipui. E toavalu ua tuli le ono masina o le faasalaga i le falepuipui ma o isi o latou moliaga e pei o le lafo o upu tau faafefe, faalavelave i leoleo, ma le poloka o le auala ua faamaonia ae leai se faasalaga. E toatasi le isi taulealea na molia foi i le auai i faiga faavevesi ua faasala i le ono vaiaso i le falepuipui.
O i latou ua falepuipui o Joe Junior Peseta, Sonny Motu Elia o se tausi soifua ua ono tausaga o galue i le matagaluega o le soifua maloloina, o Jason Kioa, Sefo Vaoifi, Leueni Iakopo Tua, Lafaele Vito Sakaria, Fomai, Perenise, ma Ameperosa Manaia. O Lilo Asiasi Faaitiiti 59 tausaga o le soifua o se matai ua faamaonia lona moliaga o le lafo o upu tau faamata’u ma ua nofo vaavaaia mo le 12 masina.
Ua faatonuina foi e totogi le tau o le galuega a leoleo e $500 tala. O Perenise Leata o se alii e 35 tausaga ua faamaonia foi lona moliaga o le umia o se aupega matautia o se maa ma faapafala se faasalaga ma nofo vaavaaia mo le 12 masina. Ua poloaiina foi e na te totogi le $300 tala o le galuega a leoleo.
Na vaaia le faate’ia o aiga ma nisi o le afioaga na auai i le lauina o le faasalaga ina ua aumai le togisala a le faamasinoga ua falepuipui le toaiva ae sao le toalua mai le falepuipui. O loimata o le alofa o mātua i nisi talavou o le au molia ma sa faaalia ai e se matai o le nuu, o le finagalo lava ia o le faamasinoga i lana faasalaga o loo sa’o ma tonu ma e leai se isi e oo iai sona malosi.
Sa fesiligia nisi o aiga pe aisea na lē faia ai se loia e tulai mo i latou sa tuuaia. Na tali mai se tasi o matai sa manatu e lē ogaoga se faaiuga e oo iai, peitai ua toe tutupu a’e nisi o lagona ae ua mae’a le faamasinoga ma ua aumai le faasalaga. Faaalia e se tasi o tamā matua o le afioaga le tofa Fonotoe o loo iai se teugatupe a le nuu, ma ana iloa e totogi se loia.
O nisi o le toaiva na molia e aofia ai ni taulelea se toatolu na molia i le toe polokaina o le aualatele o le Malo ia Aperila. O le gaioiga lea na la’u ane ai taga oneone ua laina i luga o le auala ae tuu ai le ipu o le falelēta’ua i le ogatotonu o le auala. O se aiga na malaga mai Fagaloa e fia oo i le falemai mo se fesoasoani i se tasi o gasegase mai lea itu o Upolu na tuai ona agai i le falemai ona e taunuu ane i Luatuanuu i le vaveao o loo poloka le auala.
Ua faaalia e le faamasino o le solitulafono o le auai i se faatupu vevesi poo le rioting e matuia ma ogaoga ma o le mafuaaga foi lea o le faia o le faasalaga faafalepuipui mo i latou na molia i lea solitulafono.
O se feau lea e momoli atu ia i latou o fuafua e faia lea solitulafono, e leai se avanoa pe a tutulai i le faamasinoga o le iuga lava o le falepuipui.
