Ua manino le saunoaga a le taitai o le atunuu o ia foi o le taitaifono o le komiti faatonu a le Iuni Lakapi a Samoa, mo tagatānuu Samoa o loo aumau i atunuu i fafo. O le sa’i o le ta’ita’i o le atunuu, o le faaaogāina lea e tagata Samoa o loo i fafo o le ‘au a le atunuu le Manu Samoa e sue tupe ai. Saunoa Tuilaepa, o le mea matuia lea e tupu ma o loo faia e tatou tagata i fafo, e ta’u loa se malaga atu i fafo o le Manu Samoa, o ane loa ua fai faasalalauga, ona pasese lea o le manatu mai i fanau ma alo o le atunuu, ae uma ane na’o sina tamai tupe lava e ave ane ma nai tama ae pokeki uma le tupe tele na maua i latou suega tupe.
“O le mea lea ua talanoa ai loa e le Iuni Lakapi le faasā ona toe faia ni sauniga faapea e sue tupe ai ae faaaogā tama taaalo. E tatau ona malolo lelei ma lava le malologa, ma tapena ai mo taaloga i fafo.”
“O le isi mea o le o fai tusi aisi e sue ai tupe, a mae’a ona fetagofi lea ave ane na’o le 1000 tala i tama ae tuu uma le fia afe i latou taga, o isi mea ua o ane faasalalau se siva e avatu iai tama, ua ova le faavalevalea o le mea o loo fai nei e tatou tagata.” “Faamolemole se se’i tuu ia le tou taufaavalea o le o atu o ‘au a le atunuu ae tou faaaogāina e sue ai tou tupe.” O le mataupu na laga ina ua faatalanoaina le aafia o le alii taalo taitoafitu a Samoa, Gordon Langkilde i lona fasi faamo’amo’a o alii taalo a le ‘au a Uelese ina ua mae’a le latou taaloga.
“O le mea lea ou te fai atu, o le matuā lelei lava o lima o le alii o Langkilde. Fai mai le lipoti na aumai ia te au na matuā iloga ona taei ma papatu foliga o le aualii lea na pigi e le tatou tama. Ia o mea faapea, o la e tiga mai ina ua mae’a le taaloga ae ai ua fia o ifo foi le vaega lea fia uu kola i le tatou tama, ia pigi loa.” O lipoti lata mai ua molia e leoleo le alii o Gordon Langkilde.
