Ua tutumau pea le Komiti a le Autoeaina a le ekalesia EFKS e lē toe suia le latou faaiuga ua aveesea ai i se tulaga mausali le tofi Toeaina ma le Toeaina Faatonu o le susuga i le faifeau o Kerita Reupena sa vaaia le matagaluega a Kuiniselani.
Peitai o le avanoa na mafai ona fesiligia ai le Failautusi Aoao o le Ekalesia Faapotopotoga Kerisiano Samoa, le susuga Dr Iutisone Salevao, na ia faaalia ai, e leai se gaioiga matuia ua solia e le faifeau. O lona finagalo na ia folasia i se feiloaiga ma tusitala, ua lē lelei le vaaiga o le matagaluega e le faifeau ma ua silasila atu le au toeaina ua malepe le matagaluega auā ua oese isi aulotu. O le mafuaaga lea na faia ai le faaiuga a le au toeaina e vaelua loa i ni matagaluega se lua.
O le mataupu lenei na lipotia muamua sa tetee ai le susuga Kerita i le faaiuga ua faia ia te ia, i lana mau na mafua le faaiuga ona ua ia fesiligia nisi o mataupu i le lotoifale o le ekalesia e faasino i tausaga o le soifua o le taitaifono o le komiti o le au toeaina ua oo i le 71 ae o loo galue pea.
Sa ia fesiligia foi le $600 afe o se tinoitupe a le ekalesia aoao sa totogi ai se vaega o le nonogatupe a le ekalesia EFKS a Salailua i le NPF, ae lē o iloa pe ua toe totogi ia tupe a le ekalesia.
I le feiloaiga ma le Failautusi Aoao na ia tali mai ai i nei mataupu mo le silafia e le ekalesia ma le atunuu, ona ua salalau faamatalaga i leitio ma televise ma nusipepa. Saunoa mai Iutisone e lē mafai e le ekalesia ona aulia loa le 70 tausaga o se faifeau ona tu loa lea o le loli i se faatonuga a le ekalesia, ona faapea atu lea, tapena loa au mea ma tuua le ekalesia ua uma lou aogā.
“E lē mafai ona faia e le ekalesia se mea faapena, o toeaiina nei o nisi e lasi tomai o loo iai, ma atonu ua aogā foi le iai pea o le susuga Peleti i lana ekalesia e toe maua ai nisi tomai o ia te ia, a o lei tuua le galuega faafaifeau”.
O le $600 afe na fesiligia na faailoa e Iutisone ua iai le iugafono e lē toe totogia. O lona uiga e lē o nofo aitalafu le ekalesia EFKS a Salailua i le ekalesia i se vega tupe faapea.
O le saunoaga mai a le Failautusi Aoao o loo ia te ia le iugafono ae sa ia lē mafai ona tuuina ane se kopi o le iugafono i tusitala. O le fuafuaga a le susuga Kerita ma lona faletua e ave le mataupu i le faamasinoga e ala i le la loia le afioga Leuluaialii Olinda Woodroffe, na saunoa le Failautusi Aoao o le laua lea aiā tatau.
O le a nofo faatalitali foi le ekalesia i lea tulaga i se taimi e oo atu ai se faaaliga. O le faaiuga a le au toeaina na faaalia e Iutisone e gata lava i totonu o le lotoifale o le au toeaina, e lē talanoaina i fonotaga tetele lea e masani on usuia i le masina o Me o tausaga taitasi.
O le fesiligia e le tamaitai loia o Leuluaialii Olinda o le leai o se taiala poo se Code of Ethics e faatonutonu ai le galuega a faifeau, na faaalia e le Failautusi Aoao e sa‘o.
“Ua aogā foi le mataupu lenei atonu o le a silasila ai e faia se Code of Ethics e faigofie ai foi le galuega a le au toeaina”, na saunoa ai Dr Iutisone Salevao.
O loo iai le avanoa e mafai ona toe faatalatalanoa ai le faaiuga ua faia e le au toeaina e pei ona fesiligia e le tusitala le Failautusi Aoao. Peitai o se avanoa e fua i se finagalo o le au toeaina pe afai e iai se fuafuaga a le matagaluega a Kuiniselani poo le aulotu foi o loo tausia e le faifeau ua faia i ai le faaiuga e talosaga ai i le au toeaina.
