O le Faatonu o le ata lauiloa o le Silamanino le faletua ia Eliza na ia faia ni suesuega i Samoa, e uiga i le pule i le ola poo fea tonu e mafua mai ai, ona o le mafuaga ua ia sailiili ai i lenei faafitauli, ona sa iai se tamaititi sa galue fesoasoani i nisi o tapenaga i tua o le ata o le Silamanino na ia pule i lona ola i le faaiuga o Ianuari i le amataga o lenei tausaga.
O lenei faalavelave na tulai mai i lenei atalii, na tupu a‘e ai se lagona ia te ia, se‘i ona sailiili poo le ā tonu le mafuaaga ua tulai mai ai pea lenei faafitauli i totonu o le atunuu, aemaise lava o nei fanau.
O le mae‘a ai o le suesuega a le faletua ia Eliza, ma ia mauaina ai ni faamaumauga e toaona i latou i le va o le 19 tausaga i le 22 tausaga le matutua sa pule i soifua i le amataga o le tausaga. O nei talavou e toaono, e 4 tamaitai ae 2 alii.
O le tulai mai ai o le pule i le ola i nei fanau, e mafua mai lava o totonu o aiga, ma o lea na ia taumafai ai loa e tusia se tala ma pueina ai se ata tifaga, auā o lona talitonuga e aogā lenei taumafaiga e fesoasoani ai i o tatou aiga ina ia foia ai lenei faafitauli o loo tulai mai pea.
O lenei ata o loo faaautu lava i lana suesuega sa fai i nai faafitauli o loo feagai ma totonu o aiga, e lē gata i le pitolaau a mātua, i le faataetae a luga o le faatāuaina o le fanau, i lo latou va ma a latou foi fanau, ma ua aafia ai lava le tamaitiiti i le tulaga ua oo i ai le tele o mea ua saputu i lona mafaufau ma iu ai lava ina fai ai le faaiuga sese.
O tausaga o loo faaaogāina i lenei ata tifaga, o lalo ifo o le 19 tausaga, ina ua mae‘a le pueina o le ata, na matamata ai loa le faalapotoptoga ua faaigoaina o le Faatāua le Ola, o ni tagata o loo fai ma sui e fesoasoani i le polokalame o le taofia o le Pule i le Ola.
I le silasila ma le maimoa a lenei faalapotopotoga na latou ioeina ai o le a telē se fesaosaoni a lenei ata i le taumafai lea ia latou polokalame ina ia puipuia ai le tulaga lea, ma o le mafuaaga foi lea ua tatala aloia ai i Samoa le ata i le Aso Toonai, ma le faamoemoe e ave atoa i le Faataua le Ola latou te galulue faatasai i le faapolokalameina o le tatalaina o le ata, ma o le seleni o le a maua ai i lea po, ona tuu sa‘o atu lea i le Faataua le Ola i le taumafaiga o le faafitauli lea i Samoa.
O le Aso Toonai foi o le a faatau ai le ata i laufanua o Niu Sila ma Ausetalia. I se saunoaga a le faletua, e 7 aso na tuufaatasia ma pueina ai le ata, faatasi ai ma le tatalo i le Atua i taiala e faasino mai e faatinoina ai le galuega.
