E lua vaiaso na lulu ai le saito ma faagasolo ai sauniga o le Tusi Paia sa faaiuina i le Sapati Aso 8 o Setema i le itu i Matu o Brisbane.
Sa vaaia ai le mamalu o le Atua e ala i le toatele o i latou sa auai i po taitasi a o malele le saunoaga a le auauna a le Atua i taimi faigata ua iai nei aso.
O le susuga ia Pastor Tusitina Faiumu Ioane (Faafeagaiga SDA North Central) sa folafolaina le upu faauuina, o ia o se lupe faalele mai Taga i Savaii. O lenei polokalame sa lagolago malosi e nisi o Ekalesia Aso Fitu o le Toe Afio mai e iai Ipswich, Scarborough, ma Deception Bay.
O aufaipese logomalie ua faapei o pesega a agelu sa fetaliai ma faalauleleia le ala, na faaulugofie ai le upu a le Atua ma papatisoina ai agaga e toalima ae lē taulia ai i latou sa faauuina e ala i le galuega a le Agaga Paia.
O i latou sa papatisoina, o Tasi Oketopa, Tavita Stowers, Jossie Stowers, Sefo Iona ma Judy Leiataua.
O se galuega fita sa feagai ma le ofisa o le aufaatala‘i sa faafoeina le polokalame e iai le faletua ia Fofoa Schuster (Taitai o le aufaatala‘i) faapea le Ekalesia i le valaauina o uso valaaulia ae sili ai lana auauna ia Pastor Tusitina Faiumu. O le taitai toeaina o le Ekalesia o le susuga ia Laufili Haueia.
Sa taualuga le faamoemoe i le taumafataga manogi sasala na tapenaina e le Ekalesia. Sa fai ma fofoga o le aso le Susuga i le Toeaina ia Lagaaia Iona, ae o le susuga ia Pola Aupaau sa faaleoina se agaga faafetai e fai ma sui o le auvalaaulia ona o le lava tapena ma le matagofie o mea uma.
