E maeu le alofa matalasi o le Atua i le soifua tuutulu‘i o nai tuaa sinasina e ala i le faafualoaina pea o lo latou malosi.
O le aoauli o le Aso Toonai, aso 8 o Setema, na faatumulia ai le fale‘aiga a le Richland Hotel i alo ma fanau, aiga ma uo o le tina matua ia Meafou Vaiouga, i le faamanatuina o lona 90 tausaga na atoa i le Aso Faraile, aso 7 o Setema. O le tina matua e mai Lano Savaii ma Salesatele i Falealili.
Sa taitaia le sauniga e le Susuga ia Rev Tino Scanlan, faafeagaiga o le Uniting Church a Inala.
O le afioga ia Tuifaana‘e Tele‘a Tuala sa fai ma pule o le tausamaaga ma faafeiloaia le auvalaaulia. Na tasi moemoe le aofia i le tofa a Fagaima (Sui Failautusi o le Ekalesia Uniting Church) na te momolia se faafetai i aiga ona o palapala a malo ma valevalealofa sa faatinoina ona o le aso soifua o le tina matua ia Meafou Vaiouga.
Alofaaga mai le nofoaalo, aiga ma fanau faapea uo ma ē masani aemaise lau Ekalesia. Manuia tele le atoaga o le 90 tausaga o lou soifua Meafou Vaiouga!
