Ua lē uma le talanoa o le mamalu ole atunuu i Sini nei ile tulaga faagalogata na iai le aso fiafia le Samoa Day. O lenei aso e faamanatu lava i tausaga uma i taaloga, faafiafiaga, fale‘aiga ma fiafia ile Whitlam Centre i Liverpool lea e lolofi atu iai le atunuu, ae peitai ole tausaga nei ua a‘e ai se tofa male faautaga ile Komiti Faafoe ale Fono Aoao a Tagata Samoa i Sini nei e faaigoaina lenei aso ole Samoa Day.
Ose aso e patino i Tagata Samoa ma lana aganuu aemaise lana gagana, siva, faiva alofilima, lalagaina o fala, ietoga ma mamanu elei, faiva ole malofie poo le tatau samoa aemaise taumafa Samoa Elē gata i lea ose taimi muamua lenei na vaaia ai nisi o alo pepese iloga mai Niu Sila na malaga mamao mai mo lenei faamoemoe. Na amatalia le aso ise uluai savali faaaloalo muamua lea na vaaia ai le matagofie ole felanulanuai o togiga a faalapotopotoga ma tama ma teine tuai o aoga e pei Sagato Iosefo ma le SCOPA.
Ole itula foi lea ole iva ile taeao ua amata tatala ai fale‘aiga mo malu ole taeao, o nisi na amata lava i taumafa mamafa ma BBQ. Na taunuu loa le solo i totonu ole maota tele i Whitlam ma faagasolo loa le ‘ava ole feiloaiga male valaaulia na afifio atu. Ole susuga ile faifeau ia Rev Iakopo Leleimalefaga na saunia le tatalo amata ma alo atu ai loa ile ‘ava.
Ole tamaitai pese iloga mai Niu Sila ia Sarah Jane Auvaa ole Pacific Soul na usuina le Vii o le saolotoga, ae ole susuga ia Anthony Siasaga na usuina le Vii o Ausetalia.
Ole ausiva iloga a Matavai na tatalaina faafiafiaga o le aso ma faagasolo ai loa faafiafiaga seia oo lava ile itula e fitu ile afiafi ma amatalia ai loa le faaaliga o fanapepa felanulanuai mole taimi muamua.
E ta ifo le itula e sefululua ile aoauli ua amata feoma‘i tagata i fafo ile nofoaga o fale‘aiga ile matuā faatumulia ole mamalu ole atunuu na faatau taumafa, ma ofu i fale‘aiga e limasefulu na iai.
Pe tusa male sefuluafe ma ona tupu i latou na tumutumu i fafo ma totonu i faafiafiaga, na matuā uma vave ai nisi fale‘aiga ile itula 1pm, ae na faaauau pea nisi fale‘aiga seia oo lava ile taimi na amata ai fanapepa.
Elē gata i fale‘aiga a‘o nofoaga taalo o fanau i suigi, faasee, masini taavilivili na fai ai lo latou ivi. Elē gata foi i lea ose tasi o potu faapitoa mole faaaliga o measina, taga tatau, lalagaina o fala, ato, pulou ma isi galuega taulima poo le cultural hub.
Ose taimi muamua foi lenei mo nisi ole mamalu ole atunuu ua silasila ai ile faatinoina o galuega taulima a Samoa.
I luga i faafiafiaga na vaaia ai foi nisi tamaitai pepese iloga mai Niu Sila e pei o Rosita Vai, 501 Band aemaise le aufaipese toafā akapela ua faaigoaina o le ‘Klapa Samoana’ e faauluulu ile alii o Christian Malietoa Brown. O nei alo o Samoa ua lauiloa i Croatia ia latou pesepesega faa-Croatia, Samoa ma pese palagi, sa malaga mai Niu Sila ma pepese foi i Canberra. Peitai ole matagofie o ausiva mai Melepone ma ekalesia eseese na lē gaee ai le aofia ile gasolo mai. Sa maua ai foi se avanoa e afifio atu ai alo o Samoa sa taaalo lakapi liki e taitai atu e Leaupepe Nigel Vagana. Na saunoa le Pulenuu o Liverpool ia Ned Mannoun e faafetai i tagata Samoa ma lo latou sao i Sini nei, aemaise le faamamafa ole saunoa ia lagona o latou manatu ma faafitauli o aafia ai ilo latou aumau ai i Sini nei.
Sa saunoa foi le susuga ile toeaina malolo manumalo ia Rev Peleti Toese Toailoa ia tumau pea Samoa i lana aganuu ole faaaloalo male onosai.
Na saunoa faafetai le Peresetene Leilua J. Uesele ia alofagia nai fanau e faasoa atu iai le aganuu malu a Samoa ma ona itu matagofie e limataitaina ai le fanau ile agai atu ile lumanai faatasi ai male talalelei auā se lumanai manuia.
O nisi o alo iloga o Samoa na malaga mai Amerika mo le lakapi Amerika sa matuā faagaeetia ai le atunuu ole susuga lea a Jesse Sapolu ma Maa Tanuvasa, o ni alo iloga male ta‘uta‘ua ile NFL na asia le Samoa Day.Mai le to‘asefuluafe na maimoaina lenei aso, e leai se gase pe vevesi na ole agaga ole fiafia male faafetai seia oo lava ile taimi na faailoa ai ele fofoga ole aso ia Dr Tua ma Vui Masinamua le taualuga ma amata faitau ai loa upu ma faauma ai le aso ile faaaliga o fanapepa mataina.
