O le tufatufaga faailoga a le Asosi o le au pepese a le Pasefika i Aotearoa, e pei ona lagolagoina e le kamupani telefoni a le Vodafone, le Vodafone Pacific Music Awards, na molimauina ai, le maoae o le tulaga ua iai taleni a alo ma fanau o le Pasefika.
E lē gata i taleni pepese taitoatasi pe i ni vaega, ae o tomai foi ua latou tuufaatasia pe faatulaga ai ni aufaipese mo isi poo song producer.
I nei taleni uma ua matauina le toatele o alo o Samoa ua matilatila mai ai foi o latou tomai ma tele ni faailoga faapitoa na latou manumaloina i lea tufaga faailoaga.
O le afiafi o le Aso Tofi, aso 9 o Iuni 2016 i le Vodafone Event Centre i Manukau, na faataunuu ai lenei faatasiga tāua mo le lalolagi o le au pepese i Aotearoa nei. O nisi o suafa iloga o alo o Samoa sa mau faailoga i lena afiafi, e aofia ai le alii o Savage o se tasi o suafa ua lauiloa atu i le lalolagi i fafo i ana pese ma ua aloaia foi i isi atunuu.
O le alii Samoa o Vince Harder e tele ni faailoga sa ia manumaloina i lena afiafi, ma e mataina le faalogo atu i lenei alii a o ia faaleo mai lona loto faafetai i lona aiga, ma lana saunoaga, o lona aiga lava o loo sili ona latou lagolagosua i lana taleni pese aemaise foi ua faatino e Harder le tomai e mafai ai ona ia faatonutonuina ma faatulaga ni pese e pueina mo isi tagata pepese.
O le tamaitai o Annie Grace sa faamanuiaina foi i lea afiafi i lona faailoga o le tamaitai Pasefika sili ona maia lona siufofoga i lana pese o le “The Journey”.
E mataina foi le talaaga o le mafuaaga na amata ai ona naunau lenei alo o Samoa i le musika, aemaise lava o se tamaitai Kerisiano, ma o le tele o ana pesepesega, e atagia mai ai lava ona lagona faafetai ma le faagaeetia i le Atua mo le faaaogaina o lona tagata i lenei taleni o loo avea ma ana foi auala e faaoo atu ai se feau aogā i isi ona uso ma tuagane o le Pasefika.
E anoanoai isi alo ma fanau o Samoa sa maua faailoga i le tufaga faailoga o lenei tausaga, ma e iai le talitonuga, o le a faapea ai lava ona tulai mai alo o Samoa i lenei taleni i nisi foi faailoga aloaia i le isi tufaga faailoga o le a sosoo mai.
E faapea foi i se tasi o alo o Samoa, le alii o TJ Taotua sa faamanuiaina i le faailoga o le tagata pese e sili ona matagofie lana pese faaleagaga poo Best Pacific Gospel Artist. E lē o se taimi muamua lea ua manumaloina ai e Tautua se faailoga mai nei tufaga faailoga.
Ae o se tasi o alo o Samoa sa toe amanaia foi lona sao i lenei taleni o le pese o le alii lea o Kas Futialo. Sa toe manumalo foi Kas ile faailoga o le Pese e sili ona manaia o loo usuina ise gagana faa-Pasefika, poo le Best Pacific Language Award, i lana ituaiga musika o le ‘Tha Feelstyle’ i le pese o le ‘Sasa’.
O Kas e ese foi le sikailiga o lana musika, e pei se tauloto o loo fai ae e toatele foi lana ia aofia e fia faalogologo i ana ituaiga o musika aemaise lava i tupulaga talavou i nei aso. Ma o musika a le alii o Kas o loo tuufaatasia ma faatonutonuina i le fale puepese a le Keila Records, o nisi foi o alo o Samoa o loo faatautaia lenei fale puepese.
Ma i le iai i lenei lava vaitau o le faalauiloaina ma le amanaia o taleni pese a alo ma tamafanau o le Pasefika aemaise foi si o tatou atunuu o Samoa, ua taulagalaga ai foi le Radio Samoa ile lagolago mai a le fale puepese a le Keila Records a le susuga Victor Keil ile faatautaia o sana tauvaga o pese mo fanauiti mai le 5 – 14 tausaga le matutua.
O loo iai i le itulau e 33 aiaiga o lenei tauvaga ma e tāua tele ona utagia mai aiaiga uma o lenei tauvaga.
