Ua tutu faatasi nei le matagaluega o le Soifua Maloloina, le Matagaluega o Aoga, Taaloga ma Aganuu faapea ai se aulotu o le One Touch Ministry ina ia faatautaia se polokalame e faalalo ai le tino puta i fanau a le atunuu.
Ua faamauina i suesuega le maualuga o le tulaga ua iai le numera o fanau a Samoa aemaise i latou i aoga tulagalua ua maua i le tino puta. O le taumafaiga la ina ia mafai ona fai se faiga e galulue ai tagata uma i le faaitiitia o lenei faafitauli.
O le tali na vaaia i le amataga o lenei vaiaso i le polokalame lea ua tatala nei i aoga tulagalua uma o le atunuu. O toleniga a le fanau o le a faatautaia e le Aulotu lea ua ta‘ua o le One Touch Ministry i Vaitele. O i latou nei o le a faatautaia faamalositino a le fanau.
O le lona lua o taumafa tatau a le fanau o le a faamalosia i aoga uma aemaise aoaoga mai i le Matagaluega o le Soifua Maloloina. O le Matagaluega o Aoga o le a mulimulitai i aoga uma ma o polokalame o taaloga a le fanau o le a ave foi i ai le faamalosi.
O le faatupega o lenei polokalame ua sau mai i le Ofisa o Niu Sila ma le Ofisa o Ausetalia atoa ai le Malo o Samoa.
Faaalia e le alii Palemia i le tatalaga o lenei faamoemoe, o le taumafaiga lenei ua mafua lava ona o le “paie o mātua e fai faalelei meaai a le fanau”.
Ta‘ua e le Taitai o le Malo o le paie lea o mātua ua lē toe faia ai taumafa e talafeagai ma le fanau ae ua na o le faatau o fish ‘n’ chips ma chicken ‘n’ chips ae ua lē agai e avane fualaau ‘aina ma fai lelei isi taumafa mo le fanau.
O le faaiuga o le vaiaso na tea nei na faagasolo ai se taamilosaga netipolo mo fanau aoga tulagalua i le atunuu lea na faatautaia e le asosi netipolo a tama ma teine tuai o le Kolisi o Samoa le SCOPA ma lagolagoina i le itu tau tupe e le Kamupani o meaaoga o le Business Systems Ltd e pei ona foai atu le $10,000 tala Samoa mo faailoga.
O le sao lea o nei tino e lua i le taumafaiga lea ua amata nei mo le tausaga atoa, o le faalalo o le tino puta i fanau a le atunuu. O le gaioi a le Matagaluega o le Soifua Maloloina ona o le popolega i le toatele o fanau ua aafia nei i le lapopoa tele, o le a faatuputupulaia ai lava le tele o gasegase lē pipisi e pei o le suka, toto maualuga, ma‘i fatu, kanesa, gugu ma isi ma‘i.
O le unai o le ola soifua maloloina o le fanau mai i le laiti, o le a tele ai foi le faasao a le Malo e ala i tupe alu i le auina atu i fafo o le toatele mo togafitiga aemaise i togafitiga i le lumanai i totonu o Samoa lava ia.
