Senior Pastors ma le Team Pepese ale Autalavou

Senior Pastors ma le Team Pepese ale Autalavou

Ua tele taimi na faalogo ai le tusitala, i tala ave ole galuega a se tasi o faifeau ole Talalelei, ile feau ma le galuega ale Atua i Sini i Ausetalia, ae lei maua lava se avanoa e feiloai ai ma le susuga ile Ta’ita’i o lea galuega.

Ole Aso Sa aso 18 o Mati ole 2018, na faato’a mafai ai ona asia e le tusitala, le malumalu ole Ekalesia ale Faith City Church, ma faato’a mafai ai loa lava foi ona faatalofa ma talanoa fesagai ai ma lē oloo faauluulu iai lea galuega ole feau ale Atua, le susuga ile Ta’ita’i Sinia le susuga ia Pastor Opeta Tautalafua, ma maua ai le avanoa e faatalatalanoaina ai ona o tala e uiga i lana galuega. I lea feiloaiga, na fesilisili ai ile tulaga ole feau ma le galuega i totonu o lana foi galuega faamisiona.

Ise finagalo faaalia ole susuga ia Pastor Opeta, na ia ta’ua ai ole latou galuega sa amata lava ise aulotu e tasi ma nai tagata toaitiiti, ma maitauina ai le faamanuiaina ona e lei toesea ae faaopoopo pea tagata lolotu.

Na saunoa ile alofa ole Atua ile Manulauti o lana misiona. Muamua ole tuuina atu lava lea ole galuega e ta’imuaina pea e le Atua, a ia lē ole tagata. Lua, ole faatāuaina lava lea o aiga ma lo latou olaga manuia, poo lona siosiomaga. Ile ma lona tolu, ole faatāuaina lea ole olaga ole fanau, e aofia ai le tupulaga talavou ma fanau laiti.

Ole pine o lea saunoaga ale susuga ile Ta’ita’i Sinia, ona ole taimi nei, ua valu (8) ai nei le aofai o Aulotu eseese na fananau mai si aulotu lava e tasi na faavaeina mai ai. I totonu foi la o lea galuega, ua mae’a foi ona faavaeina le galuega faalea’oa’oga Tusi Paia, lea oloo nafa taulimaina nei e le susuga ile faifeau ia Pastor Faafetai.

Ta’ita’i Aoao: Senior Pastor Opeta Tautalafua & Senior Pastor Faafetai

Ta’ita’i Aoao: Senior Pastor Opeta Tautalafua & Senior Pastor Faafetai

Na saunoa le Ta’ita’i ia Opeta Tautalafua, “Ole galuega ma le malumalu tapuai ua faatino ai nei tapuaiga, ose maota fou ua mae’a foi ona totogi motu i tau talafeagai, ona ua lē ofi ma ua laititi le maota sa amataina mai ai le galuega”. Ose tasi o ana saunoaga na ia ta’ua ai e faapea, “E lē ole taugata o Fale Tapuai, ae o Agaga o ē o Tapuai.”

Ole taimi nei foi, oloo ua toe tilotilo ai le Misiona (Ministry) ile toe fia faatauina lea ose isi nofoaga mo le fanau laiti auā a latou Aoga Aso Sa. Ona e ui ina oloo iai se vaega i luga ole maota oloo faamautu iai le fanau, ae ua lē taitai ona a’ua’u mo manaoga mo le fanau. “O lea ua toe vaavaai ai ile isi maota lena oloo tu mai le faafeagai mai iinei (na faasino ile isi vaega o poloka oloo ile isi itu), ole vaega tonu lena ua vaavaai nei iai mo lea faamoemoe,” ole saunoaga lea a Snr. Pastor Opeta Tautalafua.

Na ia saunoa foi e faapea, o isi aulotu uma lava o i Sydney, o aiga na vavae ese atu mai le galuega lava lea i Prestons, ona ua lē mafai ona ofi ile malumalu tuai, ma amataina ai loa ia galuega, ma ua oo atu lava ile silia ma le ta’i 20 matafale o ia galuega, faatasi ai ma isi aulotu ua faavaeina ma faatutūina i Melepone ma Kuiniselani.

E momoli ai le faamalo mai le sui ole Samoa Times, ile susuga ile Ta’ita’i Sinia ia Snr. Pastor Opeta Tautalafua ma le susga foi ia Pastor Faafetai, ona ole avanoa ua maua e faatalatalanoa ai i tulaga ole Feau ma le Galuega ale Atua ile Tovine.

Faamalo faafetai, auā ua moni lava le tala ale Tusi, “Ua itiiti mea sa ou faalogo i ai, i lo mea ua ou vaai ma molimau i ai.” E faafetai foi ile Tupulaga Talavou ona ole faatamalii ma uiga tausaafia, sa outou tali mai ai e tusa ole asiasi atu.

O la le Tusi Sa, “Auā e faia lava e outou o mea sili ma manumalo ai lava outou”.

Comments

comments