I lomiga ua tuanai atu ale Samoa Times, na lipotia ai le tapena atu ole ‘Malaga Sa’ ale Aufaipese Faapitoa ale Ekalesia Katoliko a Sini mo se valaaulia faapitoa mai le Palisi a Bari i Italia, ma faapea foi ona faaauauina atu ai lea lava faigamalaga, ise feiloaiga ma le Tamā Paia ia Pope Faranisisi (Pope Francis) ile laumua ole Ekalesia ile Vatikana i Roma.
Ole Aso Toonai, 17 o Mati 2018 ile 10 ile taeao, na potopoto ai le Ituaiga Sa, le afioga ile Konesula Aoao o Samoa i Sini ma le faletua (tofa Manogiamanu Fonoti Etuale & Safanua Ioane) le Ta’ita’ifono o Ekalesia Soofaatasi i Samoa (susuga Tiakono Kasiano Leaupepe) ma le mamalu ole atunuu i tamalii ma faleupolu ma le lavaloa ole atunuu, se’i o latou molimauina le tapenaga ale ‘Malaga Sa’ mo le valaaulia ole a tuua ai aiga ma Ausetalia.
I lea faatasiga, sa faapea foi ona tapuaao ai le afioga ile Konesula Aoao ma lona faletua, aemaise o aiga ma le valaaulia, i lo latou aao mafola ma le lima foai, auā se seleni e faimeaalofa ai ile afioga ia Patele, le Ta’ita’ifono mai Samoa ma le aumalaga, e avea o so latou sao ma sa latou maa togi e faitau ane ai, auā le faigamalaga mamalu.
Ile taunuuga ma le taualuga o lea faamoemoe, e ala i siva Samoa sa tauala lava lea ile malaga, na foaiina ai lea e le atunuu sa auai, le tinoitupe e $47,352.40.
I lea foi taumafaiga, na vaaia ai le loto nuu loto ekalesia o nisi o tamalii ma failauga ole atunuu sa malaga mamao mai lava i Melepone ma Kuiniselani, ona ole fia velo’aso ile faamoemoe.
E lei māmā ia Patele Maurice Thmpson ma le Ituaiga Sa, le afioga ile Tiakono Rev. Kasiano Leaupepe mai Samoa ma le susuga ia Sitagata Atonio Tominiko ole Ta’ita’i malaga lea aao foai. E pei la ona pa’u iai le fetalaiga ia Leulumoega poo le afioga foi ia Lafaitele, na fai ma sui ole ‘Malaga Sa’, e momoli mai le tofa ile Ituaiga Sa ma le faigamalaga, ona sa lei manatu lava ole a avea i latou ma masiofo i lea aso, ma lei manatu lava foi Asomua ole a sii lona fale ile mauga, ile alofa tulai ma le titi faitama ole atunuu.
Ole tofa ia Faatili na laga faatau auā le valaaulia ma o ia lava foi na tasi iai le ta’u auā le Usoga ma Aiga, e molimoli le agaga ole faafetai ma momoli foi se faamanuiaga mai le atunuu auā le masii atu ole faigamalaga.
E maoa’e lava foi le faatali a Patele ma Sitaga ma le Komiti, e ala ile taumafataga felanulanua’i auā le aso.
Ole aso 26 o Mati ole a tuua ai e le ‘Malaga Sa’ le malaevaalele i Sini mo Bari i Italia ma faaaauau atu ai loa mo le laumua ole Ekalesia, ole a feiloai ma toe faafiafia ai ile Vatikana i Roma.
Ole a taumafai foi le tatou nusipepa e logo puialiiina le aufaitau ma le atunuu i taualumaga uma ole iai i Italia ole faigamalaga. Faafetai ai pea ia Patele (Fr Maurice Thompson) ma le Ta’ita’i Malaga (Sitagata Atonio Sitagata) ona ole faatāuaina pea ole auauanaga ale Samoa Times e lipotiina taualumaga uma o lenei faigamalaga mamalu.
