E silia ma le $200,000 le tau atoa o se galuega na tatala aloaia i le nofoaga tutotonu o Aoga Amata a Samoa i Sogi i le faaiuga o le vaiaso.
O lenei galuega ua faamautu ai se nofoaga ua patino mo le aoga faafaiaoga lava ia a Aoga Amata. O se fuafuaga ua leva ona moemiti i ai le Asosi o Aoga Amata i Samoa ae o lea faatoa tino mai.
O le malo o Iapani na agai i ai le Asosi o Aoga Amata mo se fesoasoani lea na maua mai ai loa le seleni e $200,000 peitai na iai ma le sao o le asosi lea ua mafai ai ona fausia le faleaoga, peitai e leai ni meafale e faatotoga ai se‘i vaganā nai nofoa ma kesi sa faaaogā i le taimi a o tālia ai se fale fou mo lea aoga.
O lea foi la o le a toe agai le Asosi o Aoga Amata mo le talosagaina lava o le malo o Iapani ina ia toe fesoasoani atu.
O le faaaliga a le Malo o Iapani i lona amepasa i Samoa le afioga Tuimaugaoalii Kazimasu Shibuta e fiafia lava lona malo e fesoasoani i le atinae lenei o aoaoga e pei ona vaaia i le tele o isi faleaoga ua faatupe e le Malo o Iapani le tele o le seleni e fausia ai.
O le unai a lea atunuu ma ona taitai ina ia iai se sao o Iapani i le atinaega o le soifua manuia o tagata o Samoa ma o se fesootaiga ua tele tausaga o vaaia mo le malo ma tagata o Samoa.
O le tausaga lenei ua aofia ai aoaoga o aoga amata i lalo o le vaaiga a le Matagaluega o Aoga, Taaloga ma Aganuu ma o le unai a le Matagaluega ina ia mafai ona aofai mai Aoga Amata ma amanaia o aoaoga aloaia uma nei i Samoa.
O le tele o tausaga o faafeagaiga ma o latou faletua na faatuina ma unaia nei aoaoga a o laiti le fanau e lei atoa le tailima tausaga le matutua.
Ua avea nei ma se tasi o Faalapotopotoga tele i le atunuu ae e faamoemoe lava ana taumafaiga ma atinae i tupe e avatu e le malo atoa ai isi Faalapotopotoga ma atunuu mai i fafo. O loo iai le faamoemoe afai o lea o le a i lalo o le vaaiga a aoga a le Malo, o le a telē le fesoasoani o le a maua mai ai aemaise foi i lana aoga faafaiaoga.
O le faamuamua o lea ua mae‘a le faleaoga mo le aoga faafaiaoga ma ua iai se nofoaga e faamautu ai aoaoga a alii ma tamaitai e to‘a 60 o loo i lea polokalame i le taimi lenei.
