Vili sa‘o le 111, soo se taimi, soo se vaipanoa e te vaaia ai
O le vaiaso na tea nei na amata faamatuu ai se lapataiga faalauaitele a leoleo mo tagata uma i Aukilani i Saute, ae ui i lea e lē o faapito tasi na o le itu i Saute, peitai o se lapataiga foi o loo faasafua ma aofia uma ai soo se itumalo o le taulaga tele o Aukilani. O le taavale, o le van o le ituaiga o le Toyota Hiace lanu mūmū o loo fealualuai solo ma taumafai e piki faamalosi alo ma fanau aoga.
E tusa ai ma faamatalaga mai leoleo, o loo ta‘ua ai le tatau ona mataala mātua ma faiaoga ae ia sili ai alo ma fanau aoga, ina ia aua aua lava ne‘i latalata i ai se isi i lea van. O loo masalomia o ni tagata faaletonuga ma le amioleaga o loo feoai ma faaaogāina lea taavale, ma le faamoemoe e ave faamalosi aemaise lava o le itupa o fanau teine.
Sa faamaonia mai foi e le tele o faiaoga mai aoga i Aukilani i Saute, o loo faaauau pea lapataiga mo le fanau i lea mataupu. O se tulaga o loo matuā faamamafa i ai faamatalaga ma manatu mo le puipuiga lava o fanau aoga. O lo ua faapea foi ona taumafai ina ia vaavaai lautele ma fesootai pe afai ae vaaia lea van i nofoaga faitele.
O Otara na uluai iloa ai le van lava lea, mulimuli ane toe vaai i Papakura, ma ua mafua ai ona faia lea lapataiga faalauaitele mo le puipuia o le saogalemu o fana aoga. O se isi vaega o le a lapataiga o loo faamalosia agai i faiaoga ma aoga taitasi, ina ia saga momoli le feau ma le lapataiga mo tamaiti aoga.
O loo fautuaina foi e leoleo faiaoga ma mātua ina ia a‘oa‘oina lelei ma faatonu le fanau, ia aua ne‘i latalata pe oso i totonu o soo se taavale lava e ofoina ane se fesoasoani, pe afai e lē masani ai i tagata o loo i totonu o le taavale.
Ia lē na o le taimi e agai ai i aoga, ae faapea foi ma le taimi e tuua ai, atoa ai foi ma itula uma o le aso, aemaise ai o lea o le a feagai fanau ma tuuaga o aoga i le vaiaso nei. E lei mautinoa i lipoti sa tuuina mai, poo ā ituaiga tagata, ae toafia foi i latou o loo faagaioia ma faia lea tulaga tau faamata‘u i fanau.
Na pau lona tulaga lelei ma le fesoasoani tele sa faamatuuina mai, o le ata o loo maua ai foliga o le van ma lea taavale. O loo manino ma e tatau i tagata uma ona faigofie ona iloa ma silafia i soo se nofoaga lava e vaaia ai.
O loo tulimataia pea e leoleo le taavale lea, aemaise ai o loo ua tuuavanoa foi mo tagata lautele i soo se aai o Aukilani, ina ia galulue faatasi mo le sailia ma le pueina o i latou ia.
O loo tatalo foi leoleo ina ia vave ona fesootai ma valaau le numera televave o le 111, pe a vaaia lea taavale i soo se itu poo Saute, Sisifo poo Sasae foi ma isi vaega o Aukilani.
