E ala eseese faatinoga o sailiga seleni auā le faaleleia o le galuega a le Atua, ma e talitonu le agaga e aofia ai soo se ekalesia i soo se lanu, gagana, igoa aemaise foi o le lapoa, auā ua maitauina i nei atunuu, e lē o faapito manū ia tasi auā e feololo foi le saili seleni a ekalesia Samoa i sailiga seleni a ekalesia a isi atunuu.
E le gata i lea, o le lapoa lava o le ekalesia o le tetele foi ia o sailiga seleni pe afai o loo tupu ma ola le galuega, aemaise lava o le fausiaina o malumalu tapuai. O se tasi o paaga mafana a la tatou auaunaga i Melepone le susuga i le faafeagaiga ia Salesi mai le atumotu o Toga, e iai tamalii Samoa o loo latou galulue faatasi i la latou ekalesia ae toatele i le itupa o tina ma tamaitai, o se tasi o a latou anavatau masani o le tuufaatasia o le taumafataga faaiu o le tausaga mo tina ma tamaitai. O le Aso Toonai la na tuanai atu na fai ai foi le faamoemoe lea o le ekalesia Toga lea, na maitauina ai le toatele o tina ma tamaitai Samoa mai ekalesia ma kamupani eseese, o uo ma paaga a le ekalesia na valaaulia, ua o latou valaaulia foi a latou uo ma paaga ona o le agaga fia fesoasoani auā ua masani i le tautua mo le galuega a le Alii.
O nisi ekalesia Samoa na valaaulia ni tina se toalua pe toatolu, ae ua afifio uma tina e faaali le lagolago, auā o se taimi lelei foi e mafuta ai ma faamasani ma isi tina. Masalo ai o le agaga faatina ma tamaitai lea na au ai la latou inailau, ia poo le manatu foi i le fuaitau masani ‘o a‘u nei a o oe taeao’.
O se tasi lenei o sao o le mafutaga a tina a le ekalesia mo le malumalu tapuai o loo sauni e fausiaina i lo latou fanua ua mae‘a faatauina. O la Aperaamo i lona atalii, e saunia lava e le Atua le tamai mamoe e osi ai le taulaga.
