E ta le 12 i le aoauli o le Aso Toonai ae vaaia loa se solo e ese mai i solo masani, o tagata e autu mai i le tele o ata a tamaiti ma le vaega leaga ua vaaia i auala tele o le taulaga o Apia. O se solo na faatautaia e le Asosi o le Lakapi a tagata matutua le Golden Oldies, ina ia saili seleni ai mo le Asosi o le Kanesa i Samoa.
“E leai lava se aiga i totonu o Samoa e lei aafia i lenei gasegase auā e iai se isi o le aiga, atoa ai ma se uo poo se tasi e masani ai ua maua i le kanesa pe ua maliu ai foi,” o le saunoaga lea a Peter Poulus o ia o se tasi o le komiti a le Golden Oldies na faagasoloina polokalame o lea sailiga seleni tele.
O le solo na savavali ai sui o asosi e lua ma soo se tasi lava ua maliu sona aiga i lenei gasegase. Na amata mai i le Fale o le Tineimu i Apia ma agai i le Uati i Matafele. Na savali ai ma le vaega lelei (super heroes) faapea le vaega leaga (villains).
O ina na faia ai se puegaata ma agai ai loa i le nofoaga o loo iai le faleaiga o le Skippy’s ma o ina na ofo ai nisi e faafuga o latou ao ae aoina ai tupe mo lenei lava faamoemoe.
O le isi vaega o lenei polokalame na agai ai loa i latou nei i le malaetaalo a le fanau i Malifa ma o ina na faatautaia ai le taaloga i le va o itu e lua mo lenei lava faamoemoe.
Mai i le tausaga e 2010 i le tausaga e 2011 na faamauina ai e to‘a 13 lava tagata ua oo atu i le Sosaiete o le Kanesa ua maua ai i le gasegase ma o se numera e talitonu e laititi tele pe a fuafua i le toatele o le atunuu e maua i soo se ituaiga kanesa ae o loo agai i le falemai ma o le tele o taimi e maua lava ua tuai i ai togafitiga.
Talu mai le 2011 e to‘a 26 lava i latou ua agai i le Asosi lenei i lona ofisa tutotonu i Motootua. O le faatupega o galuega a le Asosi e faamoemoe lava i le fesoasoani a le atunuu, kamupani eseese ma Faalapotopotoga eseese auā o se sosaiete e tutoatasi mai i le vaaiga a le malo.
E ui o lea ua vaaia lava le toatele ua agai ane e faatino sailigatupe mo lenei ofisa i Motootua e pei foi la ona vaaia i le faaiuga o le vaiaso i taumafaiga a le Asosi o le Lakapi Liki a tagata matutua.
E mālie tele le taaloga a le vaega lelei (super heroes) ma le vaega leaga (super villains) auā ua solo atoa taufetuliga ma ua fiu foi la tama tuai o le taaloga e taumafai ina ia aloaia lelei taumafaiga a itu e lua ae ua tele atu faleaitu ma vaega o ata ua faatino i luga o le malae nai i lo le taaloga lakapi.
O le tulaga tāua, e pei ona ta‘ua o le saili lea o seleni mo le Asosi auā meafaigaluega ma isi ana galuega fai i le taumafai lava e unai faalauiloa i le tāua o le taofi o auala e ono maua ai le atunuu i le gasegase o le kanesa aemaise o le fesoasoani ua ofo atu ia i latou ua maua ai i lea ma‘i o le tino.
