O le finauga a le Tautua Samoa i le tulaga mafatia o le toatele o le atunuu i le tau saili ai o galuega ma o le fesili a le Taitai o le Itu agai, Palusalue Faapo II, pe aisea ua lē faasalalau ai avanoa e silia i le 60 lea e faalogo o loo moomia i galuega a se falei‘a fou ua faatu i Samoa.
O lea falei‘a o se kamupani mai Taiwan e ana ma ua faatu i luga o le uafu i Apia. O lea pisinisi ua agai mai ai vaafagota o lea atunuu i le uafu i Apia ma teu ai a latou faiva ae toe agai i ogasami o le Pasefika ua faataga ma totogi ai a latou tupe e fagotaina ia ogasami.
O Samoa ua faaaogā ona uafu e agai mai i ai vaafagota nei ma teu i Samoa ana uta o i‘a maua. E totogi Samoa i lea faatagaga ma o tuutuuga o nei feagaiga ina ia maua e tagata Samoa le 75% o le aufaigaluega i lea pisinisi.
Faaalia e le Minisita o Faatoaga ma Faigafaiva, le Afioga Le Mamea Ropati, na faasalalau uma lava nei avanoa peitai e lē taitai lava tumu avanoa faigaluega. O lana faamatalaga e toatele e agai atu mo le faatalanoaga o ia avanoa e ta‘u atu loa i ai e agai i vaafagota ma e ono oo atu i le va o le masina atoa ma le tolu masina e galulue ai i le sami, “…lē o atuga lava lena e lē toe foi mai”.
Faaalia e Le Mamea o le faafitauli e manatu tagata nei i o latou taitoalua e mafua ai le lē mananao e umi ona o ese mai i aiga.
“O le ma‘i la lena o loo iai ae e tele avanoa faigaluega,” o se faaaliga lea a le alii Minisita.
Faaalia foi e le alii Palemia, le Susuga Tuilaepa Lupesoliai Sailele Malielegaoi, o le faafitauli foi lea e fai ma ali a‘e mai ia i latou ua ave i ai avanoa faigaluega faavaitaimi i Niu Sila ma Ausetalia, e lei leva ona o atu i fafo ae vina e toe foi mai i Samoa.
“Ua iai lo‘u manatu e tatau ona faatu se iuni o tagata faigaluega e ma‘i manatu ma o tagata la ia e lē tatau ona ave i ai galuega nei auā e lē toe maua ai e latou faamanuiaga faapenei,” o le finagalo lea a le Palemia.
Na sosoo ma le saunoaga a le Fofoga Fetalai o le Palemene, le Afioga Laaulialemalietoa Leuatea Polataivao Fosi, e pei ona ia toe faamanatu ai i le atunuu le tele o lafoga ma manatu ua faaali ai le lē fiafia o le atunuu i le lē lava o galuega mo le toatele ae o lea foi e maua galuega ae e lē o fia faigaluega ai le toatele.
Ta‘ua e le fofoga o le Maota, o le tulaga foi lea na iai tausaga ua mavae i galuega o atinae a le Malo lea na valaau ai lava i tagatānuu o Saina ma isi nuu tuaoi o Samoa e galulue ai ona o le lē galulue o tagata Samoa.
Sa ia fautua i le atunuu e faaaogā avanoa ua aumai ai kamupani mai i fafo e le Malo mo nei avanoa faigaluega.
