Ua mae‘a le fono tele a le Ekalesia Aso Fitu Tutoatasi ae o loo faaauau ona laga finagalo faaalia o taitai o lea Ekalesia ma le Ekalesia a le Aso Fitu o le Toe Afio Mai, lea e i Lalovaea, ona o lafoga na faia e le taitai o le Ekalesia Aso Fitu Tutoatasi na faasalalau e le TV 3.
O le lafoga na ta‘ua e ia lipoti ua faia faasaga i pulega a le Ekalesia Aso Fitu o le Toe Afio Mai, lea ua silia ma le 100 tausaga talu ona faavae i Samoa, ma o lea ua vavae ese mai ai le Ekalesia Aso Fitu Tutoatasi. O le faamalamalamaga a le taitai o le Ekalesia Aso Fitu Tutoatasi o Samoa, o Pastor Uili Papu na ia ta‘ua ai, o le eseesega o le latou Ekalesia ua iai nei le SISDAC ma le SDA le Ekalesia Aso Fitu o le Toe Afio Mai, ona o le SISDAC ua pulea tutoatasi lava e tagatānuu o Samoa.
O ana polokalame faatino, o ana a‘oa‘oga ma ana galuega atia‘e ua faatautaia uma lava e tagata o Samoa, ae o le Ekalesia Aso Fitu o le Toe Afio Mai, o loo pulea mai lava i fafo. O Fiti le atunuu na ta‘ua e lea lipoti, ma o le mafuaaga lea o le tapa o se finagalo o le taitai o le SDA, o Pastor Uili Solofa lea na ia faapea mai e lē pulea e Fiti se Ekalesia Aso Fitu i Samoa. “O le Ekalesia a le Aso Fitu o le Toe Afio Mai, o loo vaaia lava lona faatautaiga e tagatānuu o Samoa,” o se saunoaga lea a Pastor Solofa. Na ia faailoa mai o le Ekalesia Aso Fitu o le toe Afio Mai, na faatuina i Samoa i le vaitau o le 1890, ma o Samoa o le lala o lona aotelega o lea Ekalesia i le Lalolagi atoa.
O le SDA e pei ona iloa ai lea e i Lalovaea lona nofoaga tutotonu i Samoa nei, o se tasi lea o lenei ekalesia i totonu o atunuu e sili atu i le 190 o loo iai nei.
E ui i lea, na ia faaalia e lē avea le aofia o le SDA i lalo o le Ekalesia tele a le Lalolagi mo le Talitonuga Aso Fitu, ma auala o le a pulea mai ai i fafo galuega faatino a le Ekalesia. “O le Komiti Tumau a le Ekalesia Aso Fitu o le Toe Afio Mai ua aofia ai a‘u nei le Peresitene o le Samoa, o le Failautusi o le Samoa aouliuli, o le Teutupe o le Samoa aouliuli ma o le taitaiga atoa lava o le ekalesia o loo faatautaia lava e Samoa,” o sana faaaliga lea. “O le SISDAC foi na vavae ese lava i latou ona o le manaoga e fia tutoatasi le faatinoga o ana galuega, ae sa galulue uma lava i lalo o le Ekalesia lenei, e ui lava la ina ua eseese taitaiga ae o le Ekalesia lava e tasi ma e tasi foi lona taiala i ana a‘oa‘oga faa-Kerisiano o loo faatautaia i ona sui,” o se tala mai lea a Pastor Solofa.
O le isi mataupu na ta‘ua i le lipoti a le TV3 na laga e Pastor Uili Papu o le itu lea ua toatele sui o le Ekalesia Aso Fitu o le toe Afio mai o loo ua soli Sapati, ma na ta‘ua e Pastor Uili Solofa e leai se ekalesia e sao mai i lea tulaga, e ala i sui e lē o mafai ona mulimuli i taiala ua faataatitia e lima taitaina ai le soifua o le tagata lotu.
“E iai lava sui o le Ekalesia e vaivai, e lē o malosi foi le ola faatuatua ma taumafai e soifua ai i taitaiga a le Lotu, ae e lē o le Ekalesia atoa ua soli Sapati.
O loo faamamalu lava a‘oa‘oga ma talitonuga a le Ekalesia ae o loo iai sui o loo faapea ona lē mafai ona atoatoa, o lo tatou olaga foi o le tagata e leai se isi e atoatoa, ae o le galuega lena o loo fai nei e ala i le tala‘iga ae lē faapea o le a ta‘u ai le Ekalesia atoa”. O le SISDAC o se tasi lenei o ekalesia ua manino le vave o le faaopoopoga o ona sui auai ma ua manino i le faalautelega o lona nofoaga tutotonu i Saleufi, o le faaopoopo o ona fanua faatau faapea nofoaga ua fausia auā le mautinoa e mafai ona auai uma ona sui i le taimi o fono tele e pei ona iai le fono tele ua mae‘a nei ona faatautaia mo vaiaso e lua.
O se fonotaga na vaaia ai le faitau afe mai atunuu mamao na mafai ona malaga mai i Samoa ma e pei lava ona ta‘ua e le taitai o le SDA i Lalovaea, o le taitai e ese ma ua suia ae o le tulaga aupito sili ona tāua o loo tauave e Ekalesia e lua, o le maua o agaga o le atunuu ina ia tapuai ma ia ola i le soifuaga Kerisiano e pei ona faavae mai ai le Talitonuga o le Aso Fitu i Samoa.
