O le Aso Toonai na tea nei na molimauina ai le felanulanuai o le laeiina e le toatele o le lanu piniki i totonu o le aai Porirua e faatāuaina ai le polokalame ua faaigoaina o le Pinikilicious, e aloaia ai le itu tau soifua laulelei ma le soifua maloloina o tina ma tamaitai Pasefika.
O lenei masina atoa, o loo faamamalu ai e tina ma tamaitai o le laumua le laeiina o le lanu piniki ina ia faailoa atu ai lo latou lagolago i lea faamoemoe aemaise ai le tetee atu i aafiaga o le gasegase o le Kanesa.
O lenei faamoemoe, sa faatinoina lea e le komiti faafoe o le Pinikilicious ina ia faaolaola lenei polokalame auā le tuleia o tina ma tamaitai Pasefika, ia fai o latou siaki tau le soifua maloloina, ma vave foia ai ma togafitia ni o latou ma‘i, a o lei oo atu i se aafiaga o o latou soifua.
Na saunoa le taitaifono o le Pinikilicious, faletua ia Sueina Mapusua e faapea, o loo itiiti pea le fuainumera o pasene o tina ma tamaitai Pasefika o loo faia siaki i tausaga uma. O le ala lea o le unaia o lenei polokalame auā o loo telē pea le aafiaga o tina Pasefika o loo maliliu i le ma‘i kanesa o le susu (se‘i tulou), pe a faatusa i tina ma tamaitai papalagi ma isi atunuu.
“O lona lua ai lea o tausaga talu ona taumafai mai le Pinikilicious. O le galulue faatasi lava ma Ekalesia i Porirua e ala ia i matou nei o faletua mai Ekalesia taitasi faapea le komiti o le Pinikilicious ina ia faaolaola lenei polokalame, e faatāua ai le sao o i tina ma tamaitai totonu o aiga, nuu ma Ekalesia ae faapea foi le tulaga tau le ola maloloina”, saunoaga Faletua Sueina. O le maota a le E.F.K.S Porirua i Waitangirua na tuufaatasia ai latou faamoemoe e lē gata o le siitia o puipuiga o le Kanesa, ae peitai, o le toatele na lolofi atu e sapasapaia lenei polokalame ma maua ai le avanoa e faatinoina ai faamalositino, auā o le auga lena o le puipuia o le tele o faama‘i.
Sa tatala aloaia le aso i se sauniga lotu na taitaia e faletua o faafeagaiga mai Ekalesia taitasi o loo lagolagoina lenei polokalame ae peseina e le aufaipese a le Ekalesia Katoliko Maria Fatima mai Tawa. Na sosoo ai lea ma faamatalaga ma auiliiliina o mataupu mo le fesoasoani tele i tina ma tamaitai Pasefika, ia silafia le tāua o le faatinoina o le faia o le siaki, vaaia o fomai, faasoa ina ia fai se fa‘ata, aemaise lava mo tina ma tamaitai ua sili atu ma le 45 tausaga o latou soifua.
Sa faatinoina foi i lea aso le gaseseina o mea taumafa e aogā mo le soifua maloloina faapea le faamanaiaina o fofoga i le faaaogāina o vali ma kulimi e aogā mo le tino ma polokalame eseese mo le ola maloloina. Na fai foi le faamalositino, siva Samoa faapea tautalaga mo polokalame eseese mo fuafuaga mo le autū ola laulelei ma le soifua maloloina o tina ma tamaitai.
Sa faasoa atu foi le faletua ia Moe Sega-Tofilau o le Worship Centre Porirua, se tasi o tina sa fai ma sui e faasoa atu aafiaga o le ma‘i o le Kanesa i ona lagona a o aafia o ia i lea ma‘i. Sa ia molimoli atu se feau tāua i tina ma tamaitai uma sa auai lea aso, o loo maua le fesoasoani, ae aua le matamuli, ma ia toaga e fai siaki. Sa ia faailoa atu foi le tāua o lenei polokalame e fefaasoaai ai manatu ma lagona o tina i le itu tau le soifua maloloina faapea foi le faatāuaina o le ola maloloina mo tina Pasefika.
O le tele o finagalo faaalia o nisi sa auai i lea aso na molimauina ai le matagofie o lenei polokalame i ona tapenaga ma le faamaopoopoina, e mautinoa ai o se polokalame sa ausia i le galulue faatasi o Ekalesia i Porirua ma le Komiti o le Pinikilicious e unaia malosi le faatāuaina o le sao o tina ma tamaitai faapea auala eseese mo faamalositino ma le ola maloloina.E ova atu ma le 200 le mamalu o le atunuu na auai atu e sapaia le faamoemoe, e pei ona faasafua mai ai le valaaulia i soo se tamaitai ma soo se tina, ina ia afifio atu e talia lelei nei faamanuiaga mo latou.
O le manatu o le komiti o le Pinikilicious ina ia maua se sao e amanaiaina ai le tulaga o le soifua maloloina mo tina ma tamaitai, ma faatalatalanoa ai aafiaga ma togafitiga o le mau faama‘i o loo aafia ai pea le toatele aemaise lava le ma‘i o le kanesa, lea ua tele ina lamatia ai le soifua maloloina o tina o le Pasefika.
Ua vaavaai nei le komiti i le tausaga a sau e faalauteleina ai lenei polokalame i nuu ma aai lata ane auā le alualu pea i luma o le amanaiaina o le sao o tina ma tamaitai i totonu o Ekalesia, nuu ma aiga faapea ai foi le faatāuaina o le ola soifua maloloina lelei i le itu faaletino ma le faaleagaga.
Faamatalaga na tuuina mai
