O se agaga faagaeetia le matau ma le maimoa a mātua Pasefika aemaise le lasi o puleaoga ma faiaoga ma le tupulaga faapea malo faaaloalogia i le afiafi o le Aso Lua 23 o Setema, i le faataunuuina o le polokalame a Tu Tangata e pei ona masani ai kolisi eseese i tausaga taitasi i le laumua i Ueligitone.
Ua matau atu i le laalaa i luma o le faatinoga o siva ma pesega faa-Pasefika, i lona faatinoga i soo se taga aemaise o le faatulagaga o gaioiga eseese matagofie na molimauina i lea po o faafiafiaga.
Na iloa lelei le eseesega mai le amataga o nei faatasiga e oo mai lava i lenei tausaga ona e le gata i le felanulanuai matagofie o togiga, ae o le matagofie foi o le faatinoga o taga ma pesega mālie a soo se atumotu Pasefika sa faaalia e le tupulaga.
E lei iai se gaogao o le maota ona sa faatumulia i le aumaimoa ma o se faailoga o le solosolo lelei o faatinoga ma tapenaga a nai alo ma fanau i totonu o kolisi eseese.
Na molimauina le siitia i luga o le aofai o kolisi ua mafai ona mafuta ai i le polokalame a Tu Tangata nai lo tausaga ua tuanai. E mitamita ai le agaga ona o le faaaliga lea o le fiafia o le fanau ma aoga eseese e faatino lenei faamoemoe i tausaga taitasi.
Ua le gata i lena ae o le faatinoga foi o le agaga faafetai mai ofisa eseese o le malo e pei o le Ofisa o Tagata Atumotu ma le Ofisa o Aoga o loo latou lagolagoina i tausaga taitasi lenei faamoemoe tāua o le tausisia lea o le iloa o tu ma aga o faafiafiaga faa-Pasefika e alo ma fanau Pasefika. Na latou foaia ai ni meaalofa tupe mo aoga e auala atu i puleaoga ma komiti eseese o loo tapenaina lenei faamoemoe.
Na momoli ai foi le agaga faafetai o le afioga ia Luamanuvao Winnie Laban le Taitai Pasefika o le iunivesete o Vitoria, sa fai ma saunoaga faapitoa o le po. Na ia faalototele ai i le tupulaga o tama ma teine ina ia tumau le silafia o a latou lava aganuu a o tutupu a‘e i lenei atunuu ua fai ma o latou aiga tumau.
Sa ia faapea foi ona saunoa ia tumau i le lelei o le aoaoina i isi mataupu eseese tau aoaoga ma ia faagasolo atu i le Iunivesete o Vitoria ma lo latou tomai faa-Pasefika ma soo se tulaga maualuga tau i mataupu uma e aoaoina ai.
Avea ai lenei avanoa e momoli atu ai le faamalo ma le faafetai tele i faiaoga ma le komiti tapena faapea i latou na feagai ma le aoaoina o nei siva ma pesega ona e lē o se galuega faigofie sa fitaituga ai i le tele o aso.
E faafetai atu foi i le Tofa a Faalogo Vaai sa fai ma fofoga o le po fiafia. Ia manuia foi le feagai ai o le fanau i aoaoga ma le alo atu i tuuaga o lenei kuata.
