“O le mafuaaga lena o le matou fuafuaga e titina le suavai pe a faaaogā lē tatau”, o le faaaliga mai lea i le faauluuluga o le vaega o auaunaga lautele a le Pulega o le Suavai le susuga Peter Lokeni ina ua saili atu sona finagalo e tusa ai ma le faaaliga mai le latou pulega o le a titina le suavai o pisinisi ma aiga pe a maua o faaaogā e fui ai le auala, togalaau ma malae pe fufulu ai taavale.
O taumafaiga ia e aputiputi ai le suavai a o feagai Samoa ma mugala tetele ua iai nei talu mai le amataga o le masina lenei o Setema.
Ua molimauina le ola faalautagitagi o laau toto ma faatoaga ona o le malosi o mugala. Peitai o le faaaliga mai le pulega o le suavai e lē o talia gofie e nisi na fesiligia. “O le a mananao la e faasao le suavai ae faapefea a matou laau totō ma nai pupu talo i tuafale o loo tua atu i ai”.
Na faaalia e Peter Lokeni o loo lava ma totoe le suavai o loo teu ma faasoa atu i le atunuu peitai o lea ua amata tapenapena le pulega o le suavai ina ne‘i umi mugala, ona toe maua lea o le faaletonu sa tulai mai i le tausaga e 2011 lea na faasoasoa ai le suavai ona o le tetele foi o mugala i lena tausaga.
“E lē o faapopoleina le tele o le suavai o loo iai ae mo le silafia e le atunuu o faiga masani ia a le pulega o le lapataia o le atunuu pe a oo ina molimauina ni uiga o le tau ua malosi ai mugala ae itiiti timuga e maua”. O le taimi nei lava ia ua magumagu ma paaa le vaomatua ma ua faalogoina ai foi le leo o le loli fuimu ona o mu i ni togavao ona o galuega poo ni muli sikaleti e soona lafoai i ai.
O le faaumiumi pea o mugala i lo tatou atunuu e le gata ina lapataia ai e le pulega o le suavai aiga ma pisinisi ina ia faaaogā tatau le suavai ae aua le soona faaaogā i ni galuega e lē fetaui, ua fautuaina ai foi tagata e taofiofi le soona faaalu maumau o le suavai i isi galuega ma feau masani e pei o le fufuluina o ipu, ma le faamamāina o lavalava.
O le faaiuga o le vaiaso ua tuanai atu nei na toulu ai nai timu ae ua na o timu e palasi na o nai minute ma toe mou ese. O loo talosia ia amata le masina fou o Oketopa ma sau ai ma ni timuga mamafa e toe faasūsū ai le eleele ma tele ai foi le suavai. O le taimi foi lea o timuga o le taga muamua o le palolo i lenei tausaga 2014.
