Ua faamautuina e le Council le aso 1 o Fepuari e kilia ese ai le mau teu o loo gaogaosā ai le fanuatanu i Papatoetoe. Ua uma foi la ona momoli le aveai a lea faalapotopotoga i le mamalu o le atunuu ua tatau nei ona agai atu e aveese nisi o mea totino aogā o loo teuteuina ai luga o fanua o nisi o latou aiga o loo faaaogāina lea avanoa.
O le itu e latalata i le malaevaalele ua faamautuina mai o le a tele i ai se vaaiga o lea mataupu.
O le galulue faatasi o le Council ma le falemaliu o Ligaliga i Magele, na saunoa ai le faletua ia Kamila o lē o loo pulea lea auaunaga, na ia fautuaina ai le atunuu o Samoa ina ia vave aveesea nisi o metotino lelei o loo i tuugamau a o latou aiga, a o lei o atu le Council e kilia ma ave i le lapisi.
Sa ia fautuaina e lelei le aso malolo a Aukilani, le aso 26 o Ianuari e agai atu ai loa tagata Samoa e toe asia lea nofoaga ma fai ai loa se faiga a o lei oo i le aso ua atofaina e alu ai le kilia a le pulega. Na saunoa le faletua, o se vaega ua faia ai lea fuafuaga ona ua lē faatulagaina e le atunuu ma tagata atoa vaega na faasinoina e tuu ai teu ma mea e teuteuina ai fanua o aiga taitasi.
Aemaise o nisi o vaega o nei fanua ua uma ona totogi faapitoa mo tulaga o mea faapenei, ae o nisi o vaega e lē totogiina. E le gata i lea ua oo lava i luga o le mutia ua oo i ai faiga a le atunuu, ma e iai foi nisi o aiga e fia faaaogāina lea nofoaga mo latou tagata maliliu ae ua faalavelave isi fugalaau o isi tuugamau.
Na faamanino foi e le faletua, o loo galue nei mo le mamalu o le atunuu o loo tuuina o latou tagata maliliu i le latou auaunaga ina ia tasi lava le teu e ave i le fanuatanu. Ma o Papatoetoe le fanuatanu lea ua lapataia muamua mai, ae e iai le faamoemoe o le a aofia uma ai lava fanuatanu i totonu o Niu Sila i lenei tautua fou. Ua molimauina la le galulue malosi o le Council e faamautu lea faamoemoe i le aso muamua o Fepuari e asia ai le fanua i Papatoetoe.
