O le tausaga e 2002 lea na muai faatū ai se aoga i Samoa mo le aoaoina o le tomai faafoma‘i. O se aoga na faapea ona faatautaia e Samoa ae ta‘u ai le igoa o le itulagi lea na faaigoaina o le Oceania Medical University poo le aoga faafoma‘i a le Oceania.
Ua mae‘a ona aloaia i le lalolagi atoa le tulai mai o lea aoga ma e tatala ai le avanoa i soo se tagata o le lalolagi e aoaoina ai i luga o fesootaiga tau satelite atoa ai fesootaiga tau initaneti. O le vaiaso la na tea nei na faalauiloa ai loa se aoga faafoma‘i o le a faapea ona faia i Samoa i le Iunivesite Aoao o Samoa i Lepapaigalagala. O le a iai se fesootaiga ma le OUM ae o se aoga o le a talitutusa lava ma aoga faafoma‘i o loo faapea ona faatautaia i Fiti atoa ai Papua Niu Kini ia na agai i ai tamafanau a le atunuu mo le suesueina o lea foi tomai.
O le amataga o le sailiga o faailoga o lea tomai o le a faapea ona amata atu i le NUS e pei ona faaalia e le alii o loo pulea le OUM ma le Tapaau o le Iunivesite Aoao, i se fono ma tusitala i le faaiuga o le vaiaso.
Ta‘ua e le Pule o le OUM le afioga Lemalu Dr Limbo Fiu, o le fanau o le a maua avanoa e aoao ai i le faafoma‘i o lo latou faailoga muamua le Bachelors of Medicine o le a faapea ona aoaoina ai i Lepapaigalagala ae o i latou e agai atu i faailoga maualuga atu o le a tauave ia aoaoga e le Iunivesite o le OUM ae o aoga uma lava o le a faasoa i le faleaoga ua iai nei i le lotoā a le falema‘i tele i Motootua atoa ai le Iunivesite.
O se laasaga maualuga lenei i le itu tau i aoaoga i Samoa, o le mafai ona faatū ai o se aoga faapea sa masani lava ona tau saili ai faailoga o fanau o le atunuu ma malaga ai i atunuu mamao mo lea faamoemoe ae e pei ona ta‘ua e Lemalu atoa ai Lau Dr Asofou Soo, e lē faigofie le faatulagaga o lenei aoga auā e lē mafai ona tulai mai le aoga faafoma‘i i Samoa, ae faaaogā ai fua polokalame ua saunia e le OUM.
“O lea ua iai le Komiti o le Aoga Faafoma‘i a le Iunivesite ua tofia nei e faatino mai se polokalame mo aoaoga faafoma‘i i le NUS lava latou,” o se faaaliga lea a Lemalu Dr Limbo Fiu. “E lē mafai ona faaaogā e le NUS le polokalame ua pasia mo le OUM”. E lei leva nei ona faamaonia e Iunivesite i fafo polokalame a le OUM ma o le ituaiga faamaoniga lena ua sailia nei foi e le NUS mo le faamausali ai o lana aoga ma ua iai le fesootaiga ma aoga faafomai a Iunivesite i Canterbury ma se fesoasoani mai a le Iunivesite a Ueligitone mo lea taumafaiga a le Iunivesite i Samoa nei.
“O le faanaunautaiga lava a le Malo o Samoa ia iai se aoga e mafai ona agai sa‘o iai fanau a le atunuu ma o se auala foi lea o le a fesoasoani tele i le taumafaiga a Samoa ia lava fomai i le atunuu,” o le saunoaga lea a Lau Dr Asofou Soo, le Tapaau o le Iunivesite Aoao o Samoa.
O le taimi lenei e to‘a 35 alii ma tamaitai talavou o Samoa ma le Pasefika o loo aoaoina i le Iunivesite faafoma‘i o le Oceania (OUM) ma o le to‘a 20 o i latou i Samoa nei lava ia ma o i latou foi ia o loo aofia i le see lea e faaauau aoaoga mo tikeri i le NUS (undergraduates) ae a mae‘a ona toe agai loa lea e saili isi faailoga i le OUM.
