E ono masina na nonofo ai i Niu Sila le auvaa o le Gaualofa e faatalitali ai le taimi e tea ai le tau o afā. O lenei auvaa sa tausi uma lava i le laoa o le tofa ia Teleiai Pa‘u Edwin Puni ma le tausi.
Sa fesoasoani atu i ai nisi o le atunuu ma lagolagoina le umi sa aumau ai lenei auvaa. O nisi sa tauaao palapala malo mo le tausiga faapea foi i seleni na foaiina.
O le afiafi la o le Aso Lulu na faia ai loa le faamavaega ma i latou i le laoa o le tofa ia Teleiai Pa‘u Edwin Puni faatasi ai ma nisi o le atunuu sa auai. O lea po mulimuli na toe agai atu ai le atunuu ma meaai ma tupe e ave ma le faigamalaga auā e umi le malaga.
Sa auai atu i ai le tofa ia Manuo Failautusi Manuo, Auapaau John Une, Faimalo Allen Stowers, Tautai Toko Tofaeono, Dr Aiiloilo Elise Puni, Togiaioatua Vaifagaloa Naseri, Christina Tapu, Taiivao Siniva, Tago Fuatamalesa Pili Tago II, Faamoetauloa Isaako ma le faletua ia Vao, faatasi ai ma le mafutaga o le Pacific Collective lea o loo taitai ai Pa‘u Edwin Puni.
O le maualuga o lea po ma le faamoemoe o lauga a faleupolu na taumavae ai le mafutaga aemaise o le sasala o gasesega a sogaimiti ia Lapa, Sooalo ma Tuilagi.
Na momoli foi le agaga faafetai o le faatamā o le Gaualofa ia Lauaki Lavatai Maelagi i le tofa ia Pa‘u Edwin Puni ma le mamalu o le atunuu e tusa ai ma le mafutaga fiafia sa iai i le ono masina, aemaise ai o le tausiga o le auvaa ma le toe po o le mafutaga.
O le taeao o le Aso Tofi na toe lagonaina ai upu faalaeiau ma upu timai mai le atunuu, aemaise o loimata o le alofa ma le misia o le mafutaga. O le alofa i lenei auvaa mai i Samoa ona o se faigamalaga umi pe a mafaufau i le tele o faalavelave ma mea e tutupu i luga o le sami.
Na soloiesea ia lagona ina ua faamanuia nisi o tamā ma tina o le atunuu ma faapea atu, ia tautai faatasi ma Iesu le faigamalaga, ia fuli fao vaa o mala ae fuli alo vaa o manū, ma ia aua ne‘i laga peau vale a ia laga peau matamata loloa.
O alofaaga ma faamanuiaga na molimoli i lea taeao ma lulu lima ai loa ma faamavae atu i le tamaitai kapeteni ia Fealofani Bruun ma le auvaa o le Gaualofa. O le upu mulimuli a le tofa ia Pa‘u Edwin Puni i le kapeteni ma le auvaa a o lei teetee le vaa ma le uafu, o Samoa e iloa i lana aga poo luga o le sami poo le ea poo soo se mea.
Ua tuuvaa atu nei le folauga mo Rarotonga pe ā ma le 14 aso ona toe faaauau atu ai lea i Samoa. O se tulaga matagofie ma se matatia i lenei auvaa ona o le tulai mai o se uluai tamaitai Samoa e kapeteniina le sa o le atunuu.
E 28 tausaga o Fealofani Bruun mai le afioaga o Samauga, Falealili ma Sagone, ua tuu atoa i ai le faatuatuaga o le atunuu ma le auvaa na te faatautaia le sa o le Gaualofa.
Ua lua ai iinei tamaitai kapeteni o Samoa i luga o vaa, o Vaimasenuu Zita Martel i le Segavao i luga o faigamea o le tai ma le tamaitai lenei o Fealofani Bruun vaa folau o le Gaualaofa.
